Fransada 26 yaşlı MMA döyüşçüsü güllələnərək öldürülüb
Fransalı MMA döyüşçüsü Penqo Bossio Vangi Paris yaxınlığında baş verən silahlı insident nəticəsində 26 yaşında həyatını itirib.
Crossmedia.az xəbər verir ki, Rusiya mətbuatı bu barədə idmançının çıxış etdiyi “Atch Academy” klubunun açıqlamasına istinadən məlumat yayıb.
Bildirilib ki, hadisə Fransanın paytaxtı Paris yaxınlığındakı Trapp kommunasında baş verib.
26 yaşlı idmançı atışma nəticəsində aldığı güllə yaralarından ölüb.
“Atch Academy” klubu idmançının ölümü ilə bağlı başsağlığı verərək onun intizamlı, hörmətcil və ətrafındakılara dəstək olan şəxs kimi xatırlanacağını bildirib.
Məlumata görə, oktyabrın 23-də baş verən silahlı hücum zamanı avtomobildə olan şəxs küçədəki insanlara atəş açıb. Hadisə nəticəsində daha bir neçə nəfər yaralanıb.
Hücumda şübhəli bilinən 39 yaşlı şəxs polis tərəfindən saxlanılıb. Fransa hakimiyyəti hadisəni terror aktı kimi qiymətləndirib.
12:42 24.10.2026
Oxunuş sayı: 54
