Xarici xəbərlər

Makrondan sərt ittiham: Respublikanı devirmək istəyirlər!

Fransa Prezidenti Emmanuel Makron oktyabrın 17-də ölkədə baş verən iğtişaşların arxasında radikal solçu qrupların dayandığını və onların məqsədinin respublika quruluşunu devirmək olduğunu bildirib.

Crossmedia.az xəbər verir ki, Fransanın “CNews” telekanalı bu barədə məlumat yayıb.

Makron oktyabrın 22-də keçirilən təhlükəsizlik müşavirəsindən sonra verdiyi açıqlamada nümayişlər zamanı baş verən zorakılıq hadisələrini sərt tənqid edib.

“Şənbə günü siyasi və hətta qiyam xarakterli hərəkətlərin şahidi olduq. Bu əməlləri məqsədi respublikanı devirmək olan mütəşəkkil radikal solçu qruplar törədiblər. Bunu açıq deməliyik və onlar özləri də bunu etiraf edirlər”, – deyə Fransa Prezidenti bildirib.

Makron zorakılıq törədənlərlə dinc etirazçıların fərqləndirilməsinin vacibliyini vurğulayıb. O, ictimai asayişin qorunması üçün tədbirlərin gücləndiriləcəyini açıqlayıb.

Qeyd edək ki, oktyabrın 17-də Fransada yaşayış xərclərinin artması və təhsil sistemindəki problemlərlə bağlı keçirilən kütləvi nümayişlər bəzi şəhərlərdə iğtişaşlarla müşayiət olunub.