COVID-19-u üzə çıxaran genetik üsul indi həkimlərə həyati qərarlar verməyə kömək edir
COVID-19 pandemiyasına səbəb olan virusun aşkarlanmasında mühüm rol oynayan metagenomik analiz üsulu bu gün də həkimlərə xəstəliklərin diaqnostikasında və həyati əhəmiyyət daşıyan qərarların verilməsində kömək edir.
Crossmedia.az xəbər verir ki, bu barədə The New England Journal of Medicine jurnalında dərc olunan elmi araşdırmada məlumat verilib.
2019-cu ilin dekabr ayının sonlarında Çinin üç böyük şəhərindən olan virusoloqlar müəmmalı ağır pnevmoniya halları ilə xəstəxanaya yerləşdirilən pasiyentlərdən götürülmüş nümunələri araşdırmağa başlayıblar. Həmin şəxslərin hamısı xəstələnməzdən əvvəl Uhan şəhərindəki Huanan dəniz məhsulları bazarında olublar.
İlkin analizlər zamanı nümunələrdəki genetik material məlum patogenlərdən heç biri ilə uyğun gəlməyib. Bundan sonra həkimlər metagenomik analiz üsuluna müraciət ediblər.
Ənənəvi testlərdən fərqli olaraq, bu üsul yalnız əvvəlcədən məlum olan mikrobları axtarmır, nümunədə mövcud olan müxtəlif mikroorqanizmlərin genetik materialını müəyyənləşdirməyə imkan verir.
Məhz bu analiz nəticəsində alimlər xəstələrdən götürülən nümunələrdəki patogenin koronaviruslar ailəsinə yaxın olduğunu müəyyən ediblər. Bu ailəyə daha əvvəl insanlarda ağır pnevmoniya epidemiyalarına səbəb olmuş, o cümlədən Yaxın Şərq tənəffüs sindromu (MERS) ilə əlaqəli viruslar da daxildir.
Beləliklə, metagenomik analiz yeni koronavirusun aşkarlanmasında əsas vasitələrdən birinə çevrilib. Bu yanaşma naməlum infeksiyaların müəyyənləşdirilməsi və həkimlərin müalicə ilə bağlı qərarlarının dəstəklənməsi baxımından da əhəmiyyət daşıyır.
05:33 17.10.2026
Oxunuş sayı: 59
