Rusiya və Ukrayna arasında gecəboyu qarşılıqlı hücumlar: 10 nəfər yaralanıb
Rusiya və Ukrayna arasında gecə saatlarında həyata keçirilən qarşılıqlı hava hücumları nəticəsində 10 nəfər yaralanıb, yaşayış binalarına və infrastruktur obyektlərinə ziyan dəyib.
Crossmedia.az xəbər verir ki, bu barədə hər iki ölkənin rəsmi qurumları məlumat yayıb.
Ukraynanın Uman şəhərinə endirilən Rusiya zərbəsi nəticəsində 5 nəfər yaralanıb. Ukrayna Dövlət Fövqəladə Hallar Xidmətinin məlumatına görə, hücum nəticəsində 10 mərtəbəli yaşayış binasında və avtomobildə yanğın baş verib.
Odessa vilayətinə edilən hücumlarda isə 4 nəfər xəsarət alıb. Vilayətin rəhbəri Oleq Kiper bildirib ki, 7 fərdi yaşayış evinə, enerji obyektinə və məişət malları istehsal edən fabrikə ziyan dəyib.
Rusiya Müdafiə Nazirliyi isə Odessa vilayətinin Teplodar şəhərində yerləşən və Ukrayna ordusu üçün hərbi təyinatlı yüklərin saxlanıldığı iddia edilən logistika mərkəzinə, həmçinin Odessa limanına hərbi yük daşıyan gəmiyə zərbə endirildiyini açıqlayıb.
Ukrayna Hərbi Hava Qüvvələrinin məlumatına görə, gecə ərzində Rusiya tərəfindən buraxılan 149 pilotsuz uçuş aparatından 114-ü məhv edilib və ya zərərsizləşdirilib. Ümumilikdə 27 dron 24 məntəqəyə zərbə endirib.
Rusiyanın Rostov vilayətində isə Ukrayna dronlarının hücumu nəticəsində bir nəfər yaralanıb, sənaye və anbar obyektlərinə ziyan dəyib. Vladimir vilayətində də istilik infrastrukturu hədəfə alınıb.
Rusiya Müdafiə Nazirliyi ölkə ərazisi, Krım yarımadası və Qara dəniz üzərində ümumilikdə 644 Ukrayna dronunun vurulduğunu açıqlayıb.
Tərəflərin açıqladığı məlumatları müstəqil şəkildə təsdiqləmək mümkün olmayıb.
14:31 16.10.2026
Oxunuş sayı: 113
