Xarici xəbərlər
Türkiyədə güclü leysan: İstanbul və daha 48 vilayəti daşqın təhlükəsi gözləyir
Türkiyəyə güclü leysan yağışları ilə müşayiət olunan fırtınalı siklon gəlib. Güclü yağıntılar ölkənin bir neçə bölgəsində daşqınlara səbəb olub. Təbii fəlakətin episentri İstanbul olub
Crossmedia.az xəbər verir ki, yayılan məlumata görə, İstanbulda çayın məcrasından çıxması Atatürk Olimpiya Stadionu üçün təhlükə yaradıb. Kağıthane rayonunda isə tarixi Sadabad məscidi tamamilə su altında qalıb.
Meteoroloqların proqnozuna əsasən, İstanbulda buludlu və fırtınalı hava ən azı daha 62 saat davam edəcək.
Kocaeli, Sakarya və Adana vilayətlərində də genişmiqyaslı daşqınlar qeydə alınıb. Yaşayış məhəllələrini su basıb, əsas avtomobil yollarında hərəkət məhdudlaşıb. Təhlükəli vəziyyət və küçələrin su altında qalması səbəbindən Kocaeli və Yalova vilayətlərində təhsil müəssisələrində dərslər təcili şəkildə ləğv edilib.
Türkiyədə vəziyyətin gərgin olaraq qaldığı bildirilir. Türkiyə Meteorologiya Baş İdarəsi 48 vilayət üzrə sarı və narıncı təhlükə xəbərdarlığı elan edib. Fövqəladə hallar xidmətləri təbii fəlakətin nəticələrinin aradan qaldırılması üçün gücləndirilmiş iş rejimində çalışır.
15:07 15.10.2026
Oxunuş sayı: 65
