“Bütün bombaların anası” İran üçün hazırlanır: Trampın yeni planı üzə çıxdı
ABŞ ordusu İrana qarşı mümkün yeni hərbi əməliyyatlar çərçivəsində ölkənin ən güclü qeyri-nüvə bombasından istifadəni nəzərdə tutan hücum planları hazırlayıb.
Crossmedia.az xəbər verir ki, bu barədə CNN telekanalı ABŞ rəsmilərinə və hərbi planlaşdırma prosesindən məlumatlı mənbələrə istinadən məlumat yayıb.
Bildirilib ki, ABŞ Prezidenti Donald Tramp hərbi əməliyyatların bərpasına qərar verəcəyi təqdirdə İranın enerji infrastrukturu və nüvə obyektlərinə qarşı GBU-43/B Massive Ordnance Air Blast (MOAB) bombasından istifadə oluna bilər. “Bütün bombaların anası” kimi tanınan bu silah ABŞ arsenalındakı ən güclü qeyri-nüvə bombası hesab edilir.
Məlumata görə, Tramp hərbi rəhbərliyə İran ərazisindəki strateji obyektlərə qarşı əlavə zərbə variantları hazırlamağı tapşırıb. Planlar arasında ölkənin nüvə proqramı ilə əlaqəli olduğu ehtimal edilən yeraltı obyektlərin, o cümlədən “Pickaxe Mountain” adlanan ərazidəki obyektin hədəfə alınması da var.
CNN-in mənbələri bildiriblər ki, mümkün hücumlar ABŞ-da keçiriləcək Konqresə aralıq seçkilərdən əvvəl və ya sonra həyata keçirilə bilər. Bununla belə, hərbi əməliyyatların bərpası barədə yekun qərar verilməyib.
ABŞ rəsmiləri MOAB bombasının istifadəsinin İranla qarşıdurmada ciddi eskalasiyaya səbəb ola biləcəyini, lakin silahın yeraltı nüvə obyektlərinə qarşı effektivliyinin sual altında olduğunu qeyd ediblər.
Belə ki, GPS vasitəsilə idarə olunan bomba geniş ərazidə böyük dağıntılar törətmək gücünə malik olsa da, qalın qranit təbəqələri və möhkəmləndirilmiş yeraltı qurğuları dağıtmaq üçün nəzərdə tutulmayıb.
Mənbələrin sözlərinə görə, bombanın mümkün istifadəsi yalnız hərbi məqsədlərlə deyil, həm də İrana psixoloji təzyiq göstərmək vasitəsi kimi nəzərdən keçirilir.
Eyni zamanda, enerji infrastrukturu və yaşayış məntəqələrinə yaxın obyektlərin belə silahla vurulmasının genişmiqyaslı dağıntılara və mülki əhali arasında itkilərə səbəb ola biləcəyi ilə bağlı narahatlıqlar mövcuddur.
Qeyd edək ki, Tramp administrasiyası İranın nüvə silahı əldə etməsinin qarşısının alınmasını əsas strateji hədəflərindən biri kimi təqdim edir. Bununla belə, yeni zərbələrin Tehranı Vaşinqtonun tələblərini qəbul etməyə məcbur edib-etməyəcəyi qeyri-müəyyən olaraq qalır.
09:44 15.10.2026
Oxunuş sayı: 61
