İsrail 16 mindən çox hüquq pozuntusu törədib
Fələstin Azadlıq Təşkilatına bağlı Yəhudi Məskunlaşmaları ilə Mübarizə Şurası İsrail ordusu və məskunlaşanların 2024-cü ildə İordan çayının Qərb Sahilində 16 612 hüquq pozuntusu törətdiyini açıqlayıb.
Crossmedia.az Anadolu Agentliyinə istinadən xəbər verir ki, Şuranın hesabatına görə, bu pozuntulardan 13 641-i İsrail ordusu, 2 971-i isə məskunlaşanlar tərəfindən törədilib. Ən çox pozuntu Xevronda (2 934), Nablusda (2 531) və Ramallada (2 224) qeydə alınıb.
Məskunlaşanların hücumları nəticəsində Nablusda 806, Xevronda 657 və Ramallada 532 insident baş verib. Hücumlar zamanı fələstinlilərin evləri, əkin sahələri və nəqliyyat vasitələri zərər görüb.
Bundan başqa, məskunlaşanlar Qərb Sahilində 51 torpaq sahəsini ələ keçirib. 2024-cü ildə Qərb Sahilində məskunlaşan israillilərin ümumi sayı 770 420 nəfərə çatıb.
Hesabata görə, 7 oktyabr 2023-cü ildən sonra Qərb Sahili və Şərqi Qüdsdə İsrail ordusu və məskunlaşanların hücumları nəticəsində 167-si uşaq olmaqla 836 fələstinli həyatını itirib.
Gültac Mehdizadə
05:17 06.01.2025
Oxunuş sayı: 6095
