Kanak lideri Fransanı müstəmləkəçiliyə son qoymağa çağırdı
Kanak siyasətçisi və ictimai xadim, Kanak Milli Azadlıq Sosialist Cəbhəsinin (FLNKS) rəsmi nümayəndəsi və Yeni Kaledoniyanın (Kanakiya) müstəqillik hərəkatının liderlərindən biri Dimitri Keneqe Fransa müstəmləkəçiliyinə son qoymağa çağırıb. O bildirib ki, Kanak xalqı tarixində müstəmləkəçilik səhifəsi bağlanana qədər mübarizəsini davam etdirəcək.
Crossmedia.az xəbər verir ki, Keneqe bu barədə Bakı Təşəbbüs Qrupunun (BTQ) sosial şəbəkələrdəki rəsmi səhifələrində yayımlanan videomüraciətində bildirib.
O, Birləşmiş Millətlər Təşkilatında keçirilən konfransda çıxış etmək imkanı yaratdığına görə BTQ-yə təşəkkür edib və tədbirin beynəlxalq ictimaiyyətin diqqətini Kanak xalqının mövcudluğuna cəlb etməyə də imkan verdiyini vurğulayıb.
“Bu, həmçinin dünyaya, xarici aləmə mövcud olan bir ölkənin və xalqın olduğunu göstərməyə imkan verir. Bu xalq müstəmləkəçilik səhifəsini bağlayana qədər, nə qədər vaxt tələb olunursa-olunsun, mübarizəsini davam etdirəcək”, - deyə o bildirib.
Keneqe Fransa müstəmləkəçiliyinə son qoyulmasının vaxtının çatdığını vurğulayaraq, Kanak xalqının müstəmləkəçiliyin və cəmiyyətdən təcrid olunmanın davam etməsi ilə daha barışa bilməyəcəyini qeyd edib.
“72 illik müstəmləkəçilikdən sonra Fransanın bizi müstəmləkə altında saxlamağa və cəmiyyətdən təcrid etməyə davam etməsinə imkan verə bilmərik. Biz bir gün günəşin doğuşunu görməliyik”, - deyə o bildirib.
O əlavə edib ki, Fransa dekolonizasiya prosesini öyrənməlidir, çünki ölkə bu prosesi necə həyata keçirməli olduğunu hələ də anlamır.
“Düşünürəm ki, Fransanın dekolonizasiyanı öyrənməsi də onun xeyrinə olardı, çünki Fransa bu prosesi necə həyata keçirməli olduğunu heç bilmir”, - deyə Keneqe fikrini yekunlaşdırıb.
18:25 14.10.2026
Oxunuş sayı: 51
