Britaniya donanmasına ağır zərbə: Yeganə buzqıran gəmi sıradan çıxdı
Böyük Britaniya Hərbi Dəniz Qüvvələrinin yeganə buzqıran patrul gəmisi olan “HMS Protector” mühərriklərində yaranan nasazlıq səbəbindən sıradan çıxıb.
Crossmedia.az xəbər verir ki, bu barədə “The Telegraph” nəşri məlumat yayıb.
Məlumata görə, oktyabrın 13-də dənizə çıxan gəminin hər iki mühərrikində nasazlıq yaranıb. Nəticədə “HMS Protector” Plimut şəhərindəki Devonport hərbi dəniz bazasına yedəklənib.
Hazırda mütəxəssislər gəminin təmirinin mümkün olub-olmadığını araşdırırlar. Əgər onun bərpası mümkün olmazsa, yeni gəmi ilə əvəzlənməsi yalnız 2030-cu illərdə baş tuta bilər.
Qeyd edək ki, “HMS Protector” Britaniyanın Antarktida və Cənubi Atlantikada hərbi-dəniz mövcudluğunun təmin edilməsində mühüm rol oynayır.
Britaniya Hərbi Dəniz Qüvvələri gəminin limana qaytarıldığını təsdiqləyib. Lakin onun gələcək taleyi ilə bağlı hələlik yekun qərar qəbul edilməyib.
13:39 14.10.2026
Oxunuş sayı: 64
