Dünya gündəmi çalxalanır: Hərbi hücumlar, siyasi qalmaqallar...
Dünya gündəmində Yaxın Şərqdə təhlükəsizlik böhranı, beynəlxalq siyasi qarşıdurmalar, ABŞ-da federal istintaq, hərbi sahədə süni intellektin tətbiqi və texnologiya sektorundakı yeniliklər ön plana çıxıb.
Crossmedia.az xəbər verir ki, oktyabrın 13-də beynəlxalq mətbuatın diqqət mərkəzində Səudiyyə Ərəbistanında hava nəqliyyatının təhlükəsizliyi, Böyük Britaniya ilə İran arasındakı gərginlik və ABŞ konqresmeni İlhan Omarın evində aparılan axtarış olub.
ABŞ-da konqresmenin evində axtarış aparılıb
ABŞ-da Demokratlar Partiyasından olan konqresmen İlhan Omarın Vaşinqtondakı yaşayış evində federal hüquq-mühafizə orqanları tərəfindən axtarış keçirilib.
Məlumata görə, məhkəmə qərarı əsasında aparılan əməliyyat konqresmenin uşaqlıq illərində rəsmiləşdirilmiş miqrasiya sənədləri ilə bağlı cinayət araşdırması çərçivəsində həyata keçirilib.
İlhan Omar əməliyyatı Tramp administrasiyasının siyasi rəqiblərinə təzyiq göstərmək cəhdi kimi qiymətləndirib. Federal qurumlar isə axtarışın məhkəmə tərəfindən təsdiqləndiyini bildiriblər.
Cənubi Koreya hərbi əməliyyatlar üçün robotlar hazırlayır
Cənubi Koreya Müdafiə Nazirliyi ordunun ilk süni intellekt transformasiyası mərkəzini istifadəyə verib.
Seulun cənubunda yerləşən Panqyo şəhərində yaradılan mərkəzdə insanabənzər və çoxayaqlı robotların hazırlanması və təlimi nəzərdə tutulur.
Robotların minaların təmizlənməsi, partlayıcı sursatların zərərsizləşdirilməsi və təhlükəli ərazilərə hərbi ləvazimatların daşınması kimi əməliyyatlarda istifadəsi planlaşdırılır.
Layihənin məqsədi hərbçilərin həyatına təhlükə yaradan tapşırıqlarda insan iştirakını azaltmaqdır.
“Breaking Bad” serialının aktyoru 34 yaşında vəfat edib
Məşhur ABŞ serialı “Breaking Bad”də Uolter Uaytın oğlu rolunu canlandıran aktyor RJ Mitte 34 yaşında vəfat edib.
Aktyorun ölümünü onun nümayəndələri təsdiqləyiblər.
2008–2013-cü illərdə yayımlanan serialla məşhurlaşan RJ Mitte əlilliyi olan insanların hüquqlarının müdafiəsi sahəsində fəaliyyəti ilə də tanınırdı.
Səudiyyə Ərəbistanında hava limanının fəaliyyəti məhdudlaşdırılıb
Səudiyyə Ərəbistanı Yəmənin husilər hərəkatının hücumlarından sonra Ər-Riyaddakı Kral Xalid Beynəlxalq Hava Limanının fəaliyyətinə tətbiq edilən məhdudiyyətlərin müddətini uzadıb.
Ölkənin Mülki Aviasiya Baş İdarəsinin məlumatına görə, qərar hava limanının infrastrukturunun təhlükəsizliyini və uçuşlara hazırlığını yoxlamaq məqsədilə qəbul edilib.
Hava limanının fəaliyyətinin nə vaxt tam bərpa olunacağı açıqlanmayıb.
Türkiyə Prezidenti Rəcəb Tayyib Ərdoğan da Ər-Riyad hava limanına hücumları pisləyib. Hücumlar regionda təhlükəsizliklə bağlı narahatlıqları artırıb.
Böyük Britaniya İranı hərbi bazaya qarşı hücum planında ittiham edib
Böyük Britaniyanın Baş naziri Endi Börnhem sentyabr ayında Qlosterşir qraflığındakı RAF Fairford hərbi bazasına qarşı ehtimal edilən hücum planının İran İslam İnqilabı Keşikçiləri Korpusu tərəfindən idarə olunduğuna dair ciddi əsasların olduğunu bildirib.
Baş nazir parlamentdə çıxışı zamanı hadisənin İrandan koordinasiya edildiyini ehtimal etdiklərini açıqlayıb.
London araşdırma fonunda iki İran vətəndaşına qarşı yeni sanksiyalar tətbiq edib.
İran isə Britaniyanın ittihamlarını rədd edərək hadisənin araşdırılmasında əməkdaşlığa hazır olduğunu bildirib.
Yaxın Şərq və beynəlxalq siyasətdə digər hadisələr
Yaxın Şərqdə gərginlik davam edərkən Səudiyyə Ərəbistanının informasiya naziri Salman Əl-Dosari ölkəsinin müxtəlif təhlükəsizlik ssenarilərinə hazır olduğunu bildirib. O, hücumlara baxmayaraq, gündəlik həyatın normal davam etdiyini vurğulayıb.
ABŞ Prezidenti Donald Tramp Çin və Rusiyanın İrana yardım etdiyinə inanmadığını açıqlayıb. Onun fikrincə, hər iki ölkənin belə bir addımdan itirəcəyi çox şey var.
İsrailin “Haaretz” qəzetinin məlumatına görə, Səudiyyə Ərəbistanının vəliəhdi Məhəmməd bin Salman Yəməndə husilərə qarşı hərbi kampaniyaya qoşulmaq təklifini qəbul etməyib.
Bu arada İsrailin Livanla şimal sərhədi yaxınlığında partlamamış sursatın işə düşməsi nəticəsində bir nəfərin öldüyü, 24 nəfərin yaralandığı bildirilib. İsrail ordusu ilkin araşdırmaya əsasən sursatın “Hizbullah”a aid ola biləcəyini iddia edib.
BMT isə İsraili Suriya ilə 1974-cü ildə imzalanmış qüvvələrin ayrılması haqqında sazişə riayət etməyə və Suriyanın suverenliyi ilə ərazi bütövlüyünə hörmət göstərməyə çağırıb.
Ukrayna müharibəsi ilə bağlı yeni açıqlamalar
ABŞ Prezidenti Donald Tramp Rusiya Prezidenti Vladimir Putin və Ukrayna Prezidenti Volodimir Zelenskiyə müraciət edərək müharibənin dayandırılması üçün razılığa gəlməyə çağırıb.
Kremlin sözçüsü Dmitri Peskov isə Ukraynada seçki keçirilməsi məsələsinə münasibət bildirərək Kiyevin həqiqətən seçki təşkil etmək istədiyi təqdirdə Rusiyanın səsvermə günü hücumları dayandırmağa hazır olduğunu iddia edib.
“Microsoft” yeni süni intellekt prosessorunu təqdim edib
ABŞ-ın “Microsoft” şirkəti üçüncü nəsil “Maia 300” süni intellekt sürətləndiricisini təqdim edib.
Şirkətin açıqlamasına görə, yeni texnologiyanın 2027-ci ildən başlayaraq geniş tətbiqi nəzərdə tutulur.
“Maia 300” sistemlərinin enerji sərfiyyatına nisbətdə emal gücünün aparıcı qrafik prosessor sistemləri ilə müqayisədə 40 faiz yüksək olacağı gözlənilir.
Bundan başqa, 96 sürətləndiricidən ibarət sistemin əvvəlki “Maia 200” platformasından yeddi dəfəyədək yüksək emal məhsuldarlığı təmin edə biləcəyi bildirilir.
Maykl Cordanın forması rekord qiymətə satılıb
Basketbol əfsanəsi Maykl Cordanın 1998-ci il NBA finalında geyindiyi forma 14 milyon ABŞ dollarına satılıb.
“Hunt Auctions” hərrac evinin məlumatına görə, bu, basketbolla bağlı kolleksiya əşyaları arasında rekord satış qiymətidir.
Cordan həmin formanı “Çikaqo Bulls”un “Yuta Cazz”a qarşı final seriyasının ikinci oyununda geyinib.
Formanı Mayamidə daşınmaz əmlak sahəsində fəaliyyət göstərən investor Ron Firman alıb.
Sudanda aclıq təhlükəsi artır
Sudanın münaqişələrdən əziyyət çəkən bölgələrində aclıq riskinin artdığı barədə xəbərdarlıq edilib.
Məlumata görə, quraqlıq, davam edən silahlı qarşıdurmalar, məcburi köçkünlük və humanitar yardımların maliyyələşdirilməsində çatışmazlıqlar ölkədə ərzaq təhlükəsizliyi vəziyyətini daha da ağırlaşdırır.
Humanitar təşkilatlar münaqişədən zərər çəkmiş əhaliyə yardım imkanlarının genişləndirilməsinin vacibliyini vurğulayırlar.
11:01 13.10.2026
Oxunuş sayı: 85
