YPG Suriyanın yeni hakimiyyəti ilə əməkdaşlıq edəcək
Bəşər Əsədin devrilməsindən sonra küncə sıxışdırılan terror təşkilatı YPG bütün tələblərindən bir-bir imtina edir.
Crossmedia.az xarici KİV-ə istinadən xəbər verir ki, terror təşkilatı YPG və Heyət Təhrir əş-Şam (HTŞ) ilk təmaslarını edib. YPG-nin yaratdığı bölücü terror qruplaşması SDG Dəməşqdə Suriyanın yeni rəhbərliyi ilə görüşüb. YPG rəsmisi SDG-nin nəzarəti altında olan bütün bölgələrdə Azad Suriya bayrağının dalğalanmasına və təşkilat üzvlərinin Suriya ordusuna qatılmasına razılaşıb. Terror təşkilatı YPG daha əvvəl də Şamdakı yeni rəhbərliyə tabe olacağını açıqlamışdı.
Yeni rəhbərlik ölkədəki bütün silahlı qrupların Suriya Müdafiə Nazirliyinin tabeliyində toplanacağını bildirib. Yeni lider Əhməd əl-Şara ölkənin “terror təşkilatı PKK/ YPG -nin hücum bazasına” çevrilməsinə icazə verməyəcəklərini bildirib.
Suriyada yanvarın ortalarında cəmiyyətin bütün təbəqələrini bir araya gətirməyi hədəfləyən Milli Dialoq Konfransının təşkili planlaşdırılır. 1000-dən çox insanın burada iştirak edəcəyi gözlənilir.
BMT-nin Suriya üzrə xüsusi nümayəndəsi Geir Pedersen Suriyanın suverenliyi, ərazi bütövlüyü və birliyinin yenidən bərpa edilməsinin və İsrailin təcavüzünün dərhal dayandırılmasının vacibliyini qeyd edib.
Tərlan Əmrahova
18:46 03.01.2025
Oxunuş sayı: 8829
