Cənubi Koreyada prezidentin tərəfdarlarının etiraz aksiyası dağıdılıb
Cənubi Koreya polisi Prezident Yun Sok Yolun tərəfdarlarının onun rezidensiyasının girişində keçirdiyi oturaq etiraz aksiyasını zorakı tədbirlərlə dağıdıb. Etirazçılar Prezidentə qarşı həbs qərarını həyata keçirmək istəyən hüquq-mühafizə orqanlarının qarşısını almağa çalışırdılar.
Crossmedia.az xəbər verir ki, bu barədə Yonhap agentliyi məlumat yayıb.
Məlumata görə, təxminən 30 nəfər polis kordonunu yararaq rezidensiyanın girişində yola oturub və prezidentin həbsinə mane olmaq üçün aksiya keçirib. Polis əməkdaşları onları zorla – qollarından və ayaqlarından tutaraq ərazidən uzaqlaşdırıblar. Etirazçılara dəfələrlə dağılışmaq barədə xəbərdarlıq edilib.
Yonhap bildirir ki, polis qüvvələrinin fəaliyyəti Antikorrupsiya İdarəsi ilə koordinasiya olunmamış ola bilər. İdarə dekabrın 31-də Prezident Yun Sok Yolun həbsinə və evində axtarış aparılmasına dair məhkəmə qərarını alıb. Agentliyin yazdığına görə, polisin bu addımları yalnız mitinq və toplantılarla bağlı qaydaların pozulmaması üçün atılıb.
Xatırladaq ki, dekabrın 14-də Cənubi Koreya parlamenti Yun Sok Yolun konstitusiyanı pozaraq hərbi vəziyyət elan etməsi səbəbilə ona impiçment elan edib. Dekabrın 31-də isə məhkəmə Prezidentə qarşı üsyan ittihamı ilə həbs qərarı çıxarıb.
Gültac Mehdizadə
13:00 02.01.2025
Oxunuş sayı: 7465
