BMT-nin İnsan Hüquqları Ofisi İsraili günahlandırıb
BMT-nin İnsan Hüquqları Ofisi çərşənbə axşamı yayımladığı hesabatda İsraili Qəzzadakı xəstəxanalara hücum edərək fələstinlilərin səhiyyə sistemini məhv etməkdə və beynəlxalq hüquqa əməl etməməkdə günahlandırıb.
Crossmedia.az xəbər verir ki, 23 səhifəlik hesabatda 12 oktyabr 2023-cü ildən 30 iyun 2024-cü ilə qədər baş verən müxtəlif hücumlar sənədləşdirilib. Hesabata görə, 7 oktyabr 2023-cü ildə Həmasın İsrailə hücumundan sonra Qəzzada baş verən qarşıdurmaların nəticəsi olaraq fələstinlilərin tibbi yardıma çıxışı ciddi şəkildə məhdudlaşıb.
“Qəzzadakı səhiyyə sisteminin məhv edilməsi və bu hücumlar nəticəsində pasiyentlərin, tibb işçilərinin və digər mülki şəxslərin geniş şəkildə öldürülməsi beynəlxalq humanitar və insan hüquqları qanunlarına hörmətsizliyin birbaşa nəticəsidir”, deyə hesabatda qeyd olunub.
İsrailin Cenevrədəki BMT-dəki daimi nümayəndəsi Daniel Meron hesabatdakı məlumatları saxtalaşdırılmış adlandırıb. O, X sosial şəbəkəsində yazıb ki, İsrail beynəlxalq hüquqa əməl edir, heç vaxt günahsız mülki şəxsləri hədəfə almır və Həması Qəzzadakı xəstəxanalardan "terror fəaliyyəti" üçün istifadə etməkdə ittiham edib.
Nabat Fərzəliyeva
07:12 01.01.2025
Oxunuş sayı: 11894
