Serbiya məhkəməsi məktəb hücumunda 10 nəfəri öldürən yeniyetmənin valideynlərini həbs edib
Crossmedia.az The Guardian-a istinadən yazır ki, Serbiyanın paytaxtı Belqradda ötən il 13 yaşlı oğlanın doqquz məktəbli və bir mühafizəçini qətlə yetirməsindən sonra məhkəmə onun valideynlərini həbs edib.
2023-cü il 3 mayda baş verən bu faciə, kütləvi atışmaların çox nadir olduğu, lakin yüksək silahlanmaya malik olan Balkan dövlətini dərin sarsıntıya salmışdı.
Cinayət məsuliyyətinə cəlb ediləcək yaşda olmadığı üçün yeniyetmə ilə bağlı məhkəmə işi açılmasa da, onun valideynləri Vladimir və Miljana Keçmanoviç məhkəmə qarşısına çıxarılıb. Belqrad Ali Məhkəməsi Vladimir Keçmanoviçi 14 il 6 ay, Miljana Keçmanoviçi isə 3 il həbs cəzasına məhkum edib.
Prokurorlar iddia ediblər ki, ata oğlunu atıcılığa öyrədib, silah və sursatını düzgün qaydada qorumaq əvəzinə, oğlunun çantasında tapança və 92 güllə saxlamağa imkan verib. Yeniyetmə də həmin silahla məktəbdə qətli törədib.
Məhkəmənin bəyanatında deyilir ki, Vladimir Keçmanoviç “ictimai təhlükəsizliyə ağır zərbə vurmaq” və “yetkinlik yaşına çatmayan şəxsi laqeydlik və istismara məruz qoymaq” cinayətlərində təqsirli bilinib. Miljana Keçmanoviç də “yetkinlik yaşına çatmayan şəxsi laqeydlik və istismara məruz qoymaq” ittihamı ilə cəzalandırılıb, lakin qanunsuz silah istehsalı və saxlanması ilə bağlı ittihamlardan bəraət alıb.
Həmçinin, atanın oğlunu atıcılıq təliminə apardığı poliqonun təlimatçısı 1 il 3 ay həbs cəzası alıb.
Həm müdafiə tərəfi, həm də prokurorluq bu qərarla razılaşmayaraq apelyasiya verməyə hazırlaşır. Baş prokuror Nenad Stefanoviç atanın və təlimatçının daha ağır cəzalandırılması, anaya qarşı bəzi ittihamların ləğv edilməsinə isə yenidən baxılmasını tələb edəcəyini açıqlayıb. Valideynlərin vəkilləri də hökmə qarşı apelyasiya edəcəklərini bildiriblər.
Nabat Fərzəliyeva
10:10 31.12.2024
Oxunuş sayı: 8036
