ABŞ və Böyük Britaniya Yəməndə husilərin mövqelərinə hava zərbələri endirib
ABŞ və Böyük Britaniyanın qırıcıları Yəməndə husilərin mövqelərinə hava zərbələri endirib.
Crossmedia.az xəbər verir ki, bu barədə Al-Masirah televiziyası TASS-a istinadən məlumat yayıb.
Husi üsyançılarının nəzarətində olan telekanalın məlumatına görə, iki zərbə Hudeydə əyalətindəki hədəfləri vurub. Hadisə ilə bağlı əlavə məlumat verilməyib.
Qəzza sektorunda Fələstin-İsrail münaqişəsinin kəskinləşməsindən sonra husilər, həmçinin “Ənsar Allah” qrupu İsrail ərazisinə zərbə endirəcəklərini və bu ölkəyə bağlı gəmilərin Qırmızı dəniz və Bab əl-Məndəb boğazından keçməsinə imkan verməyəcəklərini bəyan ediblər.
Husilər ötən ilin noyabrından etibarən Qırmızı dəniz və Ədən körfəzində onlarca mülki gəmini hədəf alıb.
Bu hücumlara cavab olaraq ABŞ və Böyük Britaniya Qırmızı dənizdə naviqasiya azadlığını təmin etmək üçün “Prosperity Guardian” əməliyyatına hazırlıqlara başladığını elan edib. Bundan sonra ABŞ və Böyük Britaniya Yəmənin müxtəlif əyalətlərində husilərin hərbi mövqelərinə müntəzəm zərbələr endirməyə başlayıb.
Gültac Mehdizadə
05:54 31.12.2024
Oxunuş sayı: 9268
