AMEA-nın İctimai Elmlər Bölməsinin Ümumi yığıncağı keçirilib
AMEA-nın İctimai Elmlər Bölməsinin müəssisələrinin 2024-cü il üzrə illik hesabatlara həsr olunmuş Ümumi yığıncağı keçirilib.
İclasda bölmənin üzvləri, bölmənin tərkibinə daxil olan elmi müəssisələrin direktorları, müavinləri, elmi katibləri, mühüm nəticələrin icraçıları, eləcə də Elm və Təhsil Nazirliyinin İqtisadiyyat İnstitutunun məsul şəxsləri iştirak ediblər.
Bu barədə Crossmedia.az AMEA-ya istinadən xəbər verir.
AMEA-nın vitse-prezidenti vəzifəsini icra edən, bölmənin Ümumi yığıncağının sədri akademik Gövhər Baxşəliyeva növbəti ildə institutların qarşısında duran əsas vəzifələri iclas iştirakçılarının diqqətinə çatdırıb.
Akademik Gövhər Baxşəliyeva bölməyə daxil olan elmi-tədqiqat müəssisələrinin 2024-cü ildəki ümumi statistik məlumatlarını diqqətə çatdırıb. Qeyd edib ki, cari ildə 33 problem, 88 mövzu, 505 iş, 98 mərhələ üzərində elmi tədqiqat aparılıb. Bunlardan il ərzində 23 mövzu, 364 iş, 43 mərhələ tamamlanıb.
Akademik Gövhər Baxşəliyeva hesabat ilində 1523 əsərin nəşr olunduğunu bildirib. Bunlardan 88 kitab və monoqrafiya (9-u xaricdə), 1493 məqalə və tezis (382-si xaricdə), 10 dərslik və dərs vəsaiti, 46 məqalənin isə impakt faktorlu jurnalda dərc olunduğunu diqqətə çatdırıb. Bundan əlavə, bölmə əməkdaşlarının əsərlərinə 3683 istinadın qeydə alındığını vurğulayıb.
Bölmə üzrə 23 beynəlxalq, 1 beynəlxalq elmi seminar, 1 beynəlxalq dəyirmi masa, 13 respublika, 52 dəyirmi masa, 39 elmi seminar, 8 kitab təqdimatı, 30-dan çox görüş, elmi-tədqiqat müəssisələrinin Elmi şuralarının 41 iclası keçirilib, 7 saziş imzalanıb.
Cari ildə İctimai Elmlər Bölməsi üzrə 23 beynəlxalq, 14 respublika konfransı, 41 elmi seminar, 13 elmi sessiya, 53 dəyirmi masa, 9 təqdimat mərasimi, 30-dan çox görüş, institutların Elmi şuralarının 41 iclasının keçirildiyi bildirilib. Bundan başqa, bölmənin elmi-tədqiqat müəssisələrində 16 mühüm nəticə əldə edildiyi, 14 kənar təşkilatdan mühüm nəticə daxil olduğu iclas iştirakçılarının diqqətinə çatdırılıb.
Sonra Abbasqulu Ağa Bakıxanov adına Tarix və Etnologiya, Arxeologiya və Antropologiya, Fəlsəfə və Sosiologiya, Qafqazşünaslıq, Şərqşünaslıq institutlarının 2024-cü il üzrə hesabatları dinlənilib.
15:07 28.12.2024
Oxunuş sayı: 20845
