“Son pərdə”: Ukraynada prezident seçkiləri keçirilir, Zelenski hakimiyyətdən gedir
Ukraynanın keçmiş Müdafiə naziri Mixaylo Fedorov Rusiya ilə müharibəyə baxmayaraq ölkədə seçkilərin keçirilməsinə çağırıb. Bu təşəbbüs Moskvanın genişmiqyaslı işğalından bəri Prezident Volodimir Zelenskinin üzləşdiyi ən ciddi daxili siyasi çağırışlardan biri kimi qiymətləndirilir.
35 yaşlı Fedorov bildirib ki, müharibə uzun müddət davam etsə belə, Ukrayna demokratik prosesin bərpası üçün hüquqi və təhlükəsiz mexanizm tapmalıdır.
“Demokratiya Rusiyanın girovuna çevrilə bilməz”, – Fedorov “YouTube”da yayımladığı videoda deyib.
Rusiya 24 fevral 2022-ci ildə genişmiqyaslı işğala başladıqdan sonra Ukraynada hərbi vəziyyət qüvvədədir və buna görə ümummilli seçkilər keçirilmir.
Fedorov Zelenskinin adını çəkməsə də, ölkənin sistemli idarəetmə böhranı ilə üzləşdiyini və korrupsiyanın müharibə səylərinə zərər vurduğunu bildirib.
Onun sözlərinə görə, uzunmüddətli müharibə şəraitində seçkilərin keçirilməsi üçün hüquqi, təhlükəsiz və real mexanizm yaradılmalıdır.
Bununla belə, seçkilərin təşkili ciddi çətinliklər yarada bilər. Hərbçilərin, xaricdə yaşayan milyonlarla ukraynalının və cəbhə bölgələrindəki vətəndaşların səsvermə hüququnun təmin edilməsi, eyni zamanda seçki prosesinin təhlükəsizliyinin qorunması tələb olunur.
Zelenskinin beşillik prezidentlik müddəti 2024-cü ilin mayında başa çatıb, lakin hərbi vəziyyətə görə seçki keçirilməyib.
ABŞ Prezidenti Donald Tramp 2025-ci ildə Kiyevin müharibədən seçkiləri təxirə salmaq üçün istifadə etdiyini bildirmişdi. Zelenski isə ABŞ və Avropa müttəfiqlərinin təhlükəsizliyi təmin edəcəyi təqdirdə 60-90 gün ərzində seçkilərin keçirilə biləcəyini demişdi.
Türkiyəli politoloq, professor Hüsametdin İnaç mövcud durum barədə Crossmedia.az-a danışıb: “
Yaxın gələcəkdə Ukraynada prezident seçkilərinin keçirilməsi gözlənilir. Rusiya dövlət başçısı Vladimir Putinin ukraynalı həmkarı Volodimir Zelenskiyə ciddi yanaşmamasının ən böyük səbəbi seçkilərin iki ildən çoxdur ki, keçirilməməsi və mövcud hakimiyyətin qanuniliyinin mübahisəli olmasıdır. Prezidentliyə ən ciddi namizəd olaraq Ukraynanın Britaniyadakı səfiri Valeri Zalujnının adı hallanır. Amma artıq keçmiş müdafiə Mixail Federovun da dövlət başçısı olmaq ehtimalı müzakirə olunur”.
O, bildirib ki, Zelenski müharibə dövründə daxildə düşmənlər qazandı: “Çünki ciddi korrupsiya hallarına yol verildi. Bu və ya digər formada vəzifəsini tərk edən siyasilər prezidentliyə namizəd kimi Zelenskinin qarşısına çıxa bilər. Yəni gələcəkdə Zelenskinin rəqibləri daha da arta bilər. Ukraynada daxili böhran getdikcə güclənir. Belə olan halda prezident seçkilərinin keçirilməsi və Zelenskinin hakimiyyətdən getməsi mümkündür. Xüsusilə əgər o, ərazi güzəştinə getmək barədə düşünsə iqtidardan kənarlaşdırılacaq”.
11:55 20.08.2026
Oxunuş sayı: 63
