Sürücülərin diqqətinə: 500 manatdan 800 manatadək cərimə edilə bilərsiniz
Sürücülər bir çox hallarda nəqliyyat vasitəsinin dövlət qeydiyyat nişanını gizlədir və ya onun oxunmasını çətinləşdirirlər. Bu məqsədlə müxtəlif örtüklərdən və digər üsullardan istifadə olunur. Belə hallar nəqliyyat vasitəsinin müəyyənləşdirilməsini və yol hərəkətinə nəzarəti çətinləşdirir.
Mövzu ilə bağlı nəqliyyat eksperti Adil Nəbiyev Crossmedia.az-a açıqlamasında bildirib ki, nəqliyyat vasitəsinin dövlət qeydiyyat nişanı avtomobilin yol hərəkətində əsas identifikasiya vasitələrindən biridir: "Onun qəsdən gizlədilməsi və kameraların oxumasına mane olacaq vəziyyətə salınması sadəcə texniki qayda pozuntusu kimi qiymətləndirilməməlidir. Belə hərəkətlər sürücünün və nəqliyyat vasitəsinin müəyyənləşdirilməsini, yol hərəkəti qaydalarının pozulmasının qeydə alınmasını və ümumilikdə nəzarət mexanizminin işləməsini çətinləşdirir. Azərbaycan Respublikasının İnzibati Xətalar Məcəlləsinin 342.9-cu maddəsinə əsasən, nəqliyyat vasitəsinin dövlət qeydiyyat nişanının görünüşünü çətinləşdirən örtüklərdən və ya qurğulardan istifadəyə görə həmin vasitə müsadirə edilməklə sürücü 500 manatdan 800 manatadək cərimə edilir. Eyni maddədə sürətin ölçülməsinə və ölçmə cihazlarının işinə mane olan antiradar və digər texniki vasitələrdən istifadə də nəzərdə tutulur. Burada mühüm fərq var. Əgər nömrə sadəcə çirkləndiyi üçün görünmürsə, İnzibati Xətalar Məcəlləsinin 342.1.7-ci maddəsinə əsasən, hərəkətdə olan nəqliyyat vasitəsinin dövlət qeydiyyat nişanının görünməsi üçün təmiz saxlanılmamasına görə 40 manat cərimə nəzərdə tutulur. Ancaq sürücü nömrəni qəsdən gizlətmək üçün xüsusi plyonka, örtük, mexanizm və ya onun görünüşünü çətinləşdirən başqa qurğudan istifadə edirsə, artıq söhbət daha ciddi pozuntudan və 500–800 manatlıq sanksiyadan gedir”.
A. Nəbiyev vurğulayıb ki, hazırkı 500–800 manatlıq cərimə məbləği kifayət qədər ciddi olsa da, problemin qarşısının alınmasında yalnız cərimənin məbləğinə güvənmək düzgün deyil. Onun sözlərinə görə, əsas məsələ cəzanın qaçılmazlığının təmin edilməsidir: “Sürücü bilsə ki, dövlət qeydiyyat nişanını gizlətdiyi və ya kameraların oxumasına mane olduğu halda bu pozuntu mütləq aşkar ediləcək və məsuliyyətdən yayınmaq mümkün olmayacaq, həmin cəzanın çəkindirici təsiri daha yüksək olar. Bununla yanaşı, qəsdən və təkrar törədilən hallara daha sərt yanaşılması müzakirə edilə bilər. Çünki nömrəni məqsədli şəkildə gizlədən şəxs bir çox hallarda təkcə nömrəsini göstərmək istəmir, həm də sürət həddinin aşılması, avtobus zolağına daxil olma, qadağan olunmuş yerdə hərəkət, parklanma və digər qayda pozuntularının avtomatik kameralar tərəfindən qeydə alınmasından yayınmağa çalışa bilər. Bu isə digər sürücülərlə müqayisədə qanunsuz üstünlük yaratmaqla yanaşı, yol hərəkəti təhlükəsizliyinə nəzarətin effektivliyini də zəiflədir. Məncə, ilk dəfə belə əmələ yol verən sürücü üçün mövcud yüksək maliyyə sanksiyası saxlanıla bilər. Lakin müəyyən müddət ərzində təkrar törədildikdə cərimənin artırılması və qanunvericilik baxımından əsaslandırıldığı halda, sürücülük hüququnun müəyyən müddətə məhdudlaşdırılması kimi daha sərt tədbirlər də nəzərdən keçirilə bilər. Eyni zamanda, kameraların və digər texniki nəzarət sistemlərinin nömrəyə müdaxilə hallarını avtomatik müəyyənləşdirmək imkanlarının genişləndirilməsi vacibdir. Məqsəd daha çox sürücünü cərimələmək deyil, hər kəs üçün eyni qaydanın işləməsini təmin etməkdir. Dövlət qeydiyyat nişanı avtomobilin şəxsiyyətini müəyyən edən əsas vasitədir və sürücü yola çıxarkən onun aydın görünməsini təmin etməlidir. Nömrəni qəsdən gizlətmək və ya oxunmasını çətinləşdirmək isə yol hərəkətinə nəzarətdən yayınmaq vasitəsinə çevrilməməlidir. Mövcud cərimələrin tətbiqinə nəzarət gücləndirilməli, qəsdən və təkrar pozuntular üçün isə daha sərt məsuliyyət mexanizmlərinin tətbiqi nəzərdən keçirilməlidir".
Nuray Mehtiyeva
16:00 18.08.2026
Oxunuş sayı: 51
