“Qarabağ” “Dinamo”nu məğlub etdi, amma…- Şərhçidən mühüm açıqlama
“Qarabağ” UEFA Konfrans Liqasında növbəti mərhələyə vəsiqə qazanaraq uğursuz ilk oyunun ardından möhtəşəm dönüşə imza atıb. Ağdam təmsilçisi III təsnifat mərhələsinin cavab qarşılaşmasında Tofiq Bəhramov adına Respublika Stadionunda Kiyev “Dinamo”sunu 2:0 hesabı ilə məğlub edib. Lublində keçirilən ilk görüşdə 0:1 hesabı ilə uduzan Qurban Qurbanovun komandası doğma meydanda iki cavabsız qolla hesabı öz xeyrinə dəyişib.
“Qarabağ”ın qələbəsində Jali Muaddib və Aleksey Kaşukun vurduğu qollar həlledici olub. Muaddib 12-ci dəqiqədə hesabı açıb, Kaşuk isə 69-cu dəqiqədə komandanın üstünlüyünü iki topa çatdırıb. Beləliklə, iki oyunun nəticəsinə əsasən 2:1 hesabı ilə üstün olan Ağdam klubu UEFA Konfrans Liqasının pley-off mərhələsinə yüksəlib.
İdman jurnalisti Kənan Məstəliyev "Qarabağ"ın Kiyev "Dinamo"su ilə matçını və komandanın növbəti mərhələdə "Tvente" ilə qarşılaşmasını dəyərləndirib.
O, "Qarabağ"ın qələbə qazanmasına baxmayaraq, komandanın hələ tam optimal formasına çatmadığını bildirib:
"Ağır qələbə oldu. Komanda hələ tam forma yığmayıb, istədiyi oyun mexanizmini oturda bilməyib. Amma Kiyevlilərlə matçda gələcək üçün müəyyən ümidlər yarandı. Səhvlərimiz də oldu, rəqibə çoxlu qol şansı verdik, amma özümüz də çoxlu qol şansı yaratdıq. Buna sevinmək olar".
K.Məstəliyev növbəti mərhələdə "Qarabağ"ın qarşılaşacağı "Tvente"nin güclü rəqib olduğunu qeyd edib:
"Növbəti mərhələdə rəqib "Tvente"dir. Tanınmış, güclü komandadır. Onlarla oyunlar çox çətin keçəcək, çünki yaxşı heyətə malikdirlər. Ancaq biz də zəif deyilik. Qurban Qurbanovun yetirmələri bir dəfə bu komandanı üstələyiblər. Bu dəfə də eyni uğurun təkrarlanmasını gözləmək olar".
Nigar Xəlilli
20:30 14.08.2026
Oxunuş sayı: 48
