Müstəqil mətbuatın səhər çağından müasir mediaya Rauf Arifoğlu – 60
Bu gün Azərbaycan jurnalistikasının tanınmış siması, ictimai-siyasi xadim, “Yeni Müsavat” Media Qrupunun təsisçisi və rəhbəri Rauf Arifoğlu (Rauf Arif oğlu Abbasov) 60 illik ömür zirvəsini fəth edir. Bu yubiley təkcə bir fərdin ad günü deyil, həm də son 30 ildən artıq bir dövrdə Azərbaycan mətbuatının keçdiyi keşməkeşli, şərəfli və inkişaf dolu yolun bir növ xülasəsidir.
Rauf Arifoğlu 1966-cı il iyulun 23-də Tovuz rayonunun Yuxarı Öysüzlü kəndində dünyaya göz açıb. 1983-cü ildə orta məktəbi bitirdikdən sonra Azərbaycan Texnologiya İnstitutunda mühəndis-texnoloq ixtisasına yiyələnib, daha sonra isə Qərb Universitetində politologiya sahəsində ali təhsil alıb.
Lakin onun əsl həyat amalı və taleyi 1988-ci ildə alovlanan Azərbaycan Milli Azadlıq Hərəkatı ilə kəsişdi. İctimai-siyasi proseslərin ön cərgəsində addımlayan R. Arifoğlu 1989-cu ilin noyabrında “Yeni Müsavat” qəzetinin əsasını qoydu. Bu, sadəcə növbəti bir nəşr deyil, xalqın müstəqillik səsini, azadlıq hayqırtısını cəmiyyətə çatdıran mühüm mətbuat tribunasına çevrildi. Eyni dövrdə “Birlik” dərgisini də işıq üzünə çıxaran gənc jurnalist mətbuatın gücü ilə mübarizəyə qoşuldu.
Qəzetin fəaliyyətinin ilk illəri olduqca çətin və təhlükəli şəraitdə keçdi: redaksiya bir müddət Gəncəyə köçürüldü, erməni-rus diversantlarına qarşı müqavimət hərəkatında fəal iştirak edildi, könüllü dəstələrin təşkilində rol oynandı.
1991-ci ildə qəzet rəsmi qeydiyyata alınaraq fəaliyyətini Bakıda davam etdirdi. Rauf Arifoğlu Müsavat Partiyasının bərpasında fəal iştirak edərək partiyanın mətbuat və informasiya katibi vəzifəsini icra etdi. Sonrakı illərdə o, media palitrasını daha da zənginləşdirərək “Cümhuriyyət”, “Yeni Turan” qəzetlərini və “Dünya” jurnalını təsis etdi.
Rauf Arifoğlunun Azərbaycan jurnalistikasına ən böyük töhfələrindən biri ənənəvi mətbuatdan rəqəmsal mediyaya keçid prosesini böyük uzaqgörənliklə idarə etməsi oldu. 2000-ci illərdən etibarən qəzeti tam müstəqil media platformasına çevirən baş redaktor, 2009-cu ildə onu siyasi partiya qərargahından ayıraraq peşəkar institusional quruma çevirdi.
O, Musavat.com portalını inkişaf etdirməklə yanaşı, 2013-cü ildə rusdilli auditoriyanı əhatə edən Minval.az informasiya portalını yaratdı. Bu gün onun rəhbərlik etdiyi media imperiyasına aşağıdakılar daxildir:
* “Yeni Müsavat” qəzeti – 35 ildən artıq fasiləsiz fəaliyyət göstərən canlı mətbuat tarixi;
* 5 aparıcı informasiya portalı (Azərbaycan və rus dillərində);
* Musavat TV internet televiziyası;
* Geniş auditoriyaya sahib sosial media şəbəkələri(Facebook, Instagram, Telegram, YouTube).
Hazırda 60 nəfərdən ibarət çevik və peşəkar komandaya rəhbərlik edən Rauf Arifoğlu 32 ildən artıq fasiləsiz media fəaliyyəti ilə müasir jurnalistikamızın ən dayanıqlı brendlərindən birini yaratmağa müvəffəq olub.
Rauf Arifoğlunun media sahəsindəki çoxillik xidmətləri, prinsipial mövqeyi və jurnalistikanın inkişafındakı rolu həm cəmiyyət, həm də dövlət tərəfindən hər zaman yüksək qiymətləndirilib:
* 2011: Azərbaycan Mətbuat Şurasının Ali Media Mükafatı;
* 2015: Azərbaycan Respublikasının Prezidenti İlham Əliyevin sərəncamı ilə “Əməkdar jurnalist” fəxri adı;
* 2016: “Mirzə Cəlil” Ali Media Mükafatı;
* 2019: “Azərbaycan Xalq Cümhuriyyətinin 100 illiyi” yubiley medalı;
* 2024: “Heydər Əliyevin 100 illiyi” yubiley medalı;
* 2026: Yubileyi ərəfəsində 2-ci dərəcəli “Vətənə xidmətə görə”ordeni.
60 yaş – həyatın müdriklik çağı, zəngin təcrübənin və yeni zirvələrə doğru addımlamaq üçün toplanan enerjinin qovuşduğu xüsusi bir mərhələdir. Rauf Arifoğlu müstəqilliyimizin ilk illərindən bu günə qədər keçilən çətin və şərəfli yolda həm tarixin canlı şahidi, həm də o tarixi yazanlardan biri olub. Onun formalaşdırdığı media məktəbi bu gün də cəmiyyətin məlumatlandırılması, milli maraqların qorunması və azad sözün inkişafı işinə sədaqətlə xidmət edir.
Hörmətli Rauf müəllim! 60 illik yubileyiniz münasibətilə sizi səmimi-qəlbdən təbrik edir, sizə möhkəm cansağlığı, tükənməz yaradıcılıq enerjisi, ailə xoşbəxtliyi və rəhbərlik etdiyiniz media qurumlarının fəaliyyətində yeni-yeni uğurlar arzulayırıq. Azərbaycan mətbuatı və cəmiyyəti qarşısındakı xidmətləriniz hər zaman yüksək ehtiramla xatırlanacaqdır.
Yubileyiniz mübarək!
Ayhan
17:00 23.07.2026
Oxunuş sayı: 75
