Media və QHT

“Məhkum olunmuş qadınlar üçün V kitab mütaliə marafonu” layihəsinin nəticələri təqdim olunub

Gələn ildən biz təkcə qadınlarla deyil, həm də yeniyetmə və məhkum olunmuş kişilərlə onların həyatına təsir göstərərək işləməyi planlaşdırırıq.

Bu barədə “Məhkum olunmuş qadınların cəmiyyətə qayıdışı” İctimai Birliyinin sədri Firuzə İsgəndərova “Məhkum olunmuş qadınlar üçün V kitab mütaliə marafonu” layihəsinin icrasına həsr olunmuş mətbuat konfransında jurnalistlərə bildirib.

O, həmçinin bu marafonun əhəmiyyətini vurğulayıb.

Tədbir Ədliyyə Nazirliyi, Penitensiar Xidmət, “Məhkum olunmuş qadınların cəmiyyətə qayıdışı” ictimai birlikləri və “Azərbaycan Nəşriyyatları Assosiasiyası” İctimai Birliyinin (ANAİB) təşkilatçılığı ilə baş tutub.

ANAİB üzvü, “Xan” nəşriyyatının direktoru, “Kitabqurdu” Oxu Marafonunun ideya müəllifi Səbuhi Şahmursoy çıxışında bu marafonun hazırlanması və qaliblərin müəyyən edilməsi prosesindən danışıb.

Daha sonra çıxış edən ANAİB-in idarə heyətinin üzvü, “Altun” nəşriyyatının direktoru Rafiq İsmayılov və ANAİB-in katibi, “Parlaq imzalar” nəşriyyatının direktoru Nurman Tariq layihə və onun nəticələri ilə bağlı təəssüratlarını bölüşüblər. Onlar da belə tədbirlərin keçirilməsinin vacibliyini vurğulayıblar.

Tədbir çərçivəsində Azərbaycan Respublikasının Prezidenti yanında Əfv Məsələləri Komissiyasının üzvü, Mətbuat Şurasının sədri, yazıçı Rəşad Məcidlə də görüş keçirilib və marafon qaliblərinin adlarının əfv siyahısı üçün təqdim edilməsi təklif olunub. Rəşad Məcid ANAİB-in bu təklifini dəstəklədiyini qeyd edib və bu mühüm məsələni komissiya qarşısında qaldıracağına söz verib.

Qeyd edək ki, sentyabrın 1-dən dekabrın 1-dək 100-dək məhkum qadınların iştirak etdikləri qiraət marafonu keçirilib. Müsabiqədə ANAİB-ə məxsus 10 nəşriyyat iştirak edib. Hər bir nəşriyyat bir kitabla təmsil olunub.

4 saylı Cəzaçəkmə Müəssisəsində mütaliə müddətində hər bir kitabın müəllifləri ilə ayrıca görüşlər təşkil olunub. Finalçılar ANAİB tərəfindən keçirilən xüsusi imtahan vasitəsilə seçilib. Müsabiqənin qaliblərinə nəşriyyatlar tərəfindən pul mükafatları və kitab hədiyyələri təqdim olunub.(Azərtac)