Qərbi Azərbaycan İcması Dərələyəz gəncləri ilə görüş keçirib
Qərbi Azərbaycan İcmasının təşkilatçılığı ilə Dərələyəz mahalının Keşişkənd və Paşalı Rayon İcmalarının birgə təşəbbüsü ilə “Dərələyəz gəncləri ilə görüş” adlı əlamətdar tədbir keçirilib. Tədbir, Qərbi Azərbaycan torpaqlarından olan gəncləri bir araya gətirərək onların milli mənsubiyyətlərini qorumaq, tarixi yaddaşı gücləndirmək və həmrəylik ruhunu artırmaq məqsədi daşıyıb.
Görüşdə Qərbi Azərbaycan İcmasının sədri, millət vəkili hörmətli Əziz Ələkbərli; Keşişkənd İcmasının sədri, professor, Pedaqoji Universitetin prorektoru Mahirə Hüseynova; Paşalı Rayon İcmasının sədri, Aqrar Universitetin fəlsəfə doktoru, dosent Faiq Xudayev; Keşişkənd İcmasının sədr müavini, iş adamı Məhəmməd Rəsuloğlu; Gənclər və İdman Komitəsinin sədri, millət vəkili Şahin İsmayılov, eləcə də tanınmış ziyalılar, ictimai xadimlər və müxtəlif bölgələrdən olan gənclər iştirak ediblər.
Tədbirin əsas məqsədi, gələcəkdə Qərbi Azərbaycanımıza sivil qaydada, beynəlxalq hüquq normalarına hörmətlə qayıdışı təmin etmək və bu istiqamətdə gənclərin üzərinə düşən vəzifələri müzakirə etmək olub. İştirakçılar Prezident İlham Əliyevin Qarabağ-Azərbaycan İcmasına verdiyi mesajların əhəmiyyətini qeyd edərək, yaxın gələcəkdə Qərbi azərbaycanlıların öz doğma torpaqlarına qayıdışına dair inamlarını ifadə ediblər.
Paşalı Rayon İcmasının sədri Faiq Xudayev çıxışında vurğulayıb: “Bu kimi görüşlər həm gənclərin milli-mənəvi dəyərlərə bağlılığını artırır, həm də onların Qərbi Azərbaycana qayıdış prosesində oynayacaqları fəal rolu aydınlaşdırır. Gənclərimiz bilməlidir ki, keçmişimizi öyrənmək və gələcəyimizi qorumaq onların üzərinə düşən ən əsas vəzifələrdəndir. Prezident İlham Əliyevin uğurlu siyasəti nəticəsində bu qayıdış sivil və hüquqi yolla reallaşacaqdır.”
Dərələyəz bölgəsindən olan gənclər də öz təəssüratlarını bölüşərək milli birlik və həmrəylik ruhunu yüksək qiymətləndiriblər. Tədbir çərçivəsində Qərbi Azərbaycan torpaqlarına qayıdışın əhəmiyyəti, bu istiqamətdə aparılan siyasət və gənclərin gələcəkdə oynayacağı rola dair geniş müzakirələr aparılıb.
Tədbirin sonunda vurğulanıb ki, Qərbi Azərbaycan torpaqları azərbaycanlıların əzəli yurdu kimi yenidən canlanacaq və bu proses, dövlətimizin uğurlu siyasəti və xalqımızın birgə səyi ilə gerçəkləşəcəkdir. Belə görüşlər isə gənclərin milli kimliyinin qorunması və tarixi yaddaşın gücləndirilməsi baxımından mühüm əhəmiyyət kəsb edir.
Maral Şahverdili
08:56 16.12.2024
Oxunuş sayı: 13968
