Rusiya hədələdi: "soyuq müharibə" isti müharibəyə çevrilə bilər
Rusiyanın xarici işlər naziri Sergey Lavrov Qərbi “soyuq müharibəni yenidən başlatmaqda” ittiham edib və bu vəziyyətin “soyuqdan isti müharibəyə” çevrilə biləcəyi barədə xəbərdarlıq edib. O bildirib ki, Qərb Rusiyanın Ukraynaya qoşun yeritmək təhlükəsi ilə bağlı xəbərdarlıqlarını ciddiyə almır və bunun Şərq-Qərb qarşıdurmasına çevrilmə riski böyükdür. Bu barədə RİA Novosti məlumat yayıb.
Lavrov qeyd edib ki, Qərbin sülhməramlı qüvvələrin yerləşdirilməsi ilə bağlı təklifləri münaqişənin daha da kəskinləşməsinə səbəb olub. Onun fikrincə, Qərb “soyuq müharibənin yenidən başlanmasının” əsas səbəbkarıdır və bu dəfə isti müharibə ehtimalı daha yüksəkdir.
Mövzu ilə bağlı verilən suallara cavabında Lavrov bildirib: “Bu cür fərziyyələr vəziyyəti daha da gərginləşdirir. Görünür, bəzi şəxslər Prezident Putinin dəfələrlə etdiyi xəbərdarlıqları eşitməməyə üstünlük verirlər.”
Fransanın xarici işlər naziri Jan-Noel Barrot isə Parisin Ukraynaya dəstəyi haqqında danışarkən, “qırmızı xətlərin” olmadığını deyib. Fransa qoşunlarının yerləşdirilməsi barədə suala cavabında o qeyd edib: “Biz heç bir variantı istisna etmirik.”
Almaniya kansleri Olaf Şolz da bildirib ki, Berlinin gələcəkdə Ukraynada sülhməramlı qüvvələrə qoşulub-qoşulmayacağını müzakirə etmək üçün hələ tezdir və bu, hazırda uyğun deyil.
Gülay Qəribova
05:05 06.12.2024
Oxunuş sayı: 7447
