Media və QHT

Azərbaycan Autizm Assosiasiyasının nümayəndə heyəti Astanada Nazarbayev Universitetində rəsmi görüş keçirib

Qazaxıstan Respublikasının Astana şəhərində Azərbaycan Autizm Assosiasiyasının nümayəndə heyəti Nazarbayev Universitetində autizm sahəsində həyata keçirilən innovativ texnoloji layihə ilə bağlı rəsmi görüş keçirmişdir. Görüş çərçivəsində autizmli uşaqlar üçün hazırlanmış proqram təminatı, süni intellekt əsaslı müdaxilə modelləri və robot-dəstəkli terapiya sistemi təqdim olunmuşdur.

Layihənin rəhbəri Anara xanım tərəfindən çıxış zamanı bildirilib ki, hazırlanan yazılım və texnoloji həllər autizmli uşaqların sosial davranışlarının izlənilməsi, terapiya prosesinin proqram vasitəsilə idarə olunması və inkişaf göstəricilərinin analitik qiymətləndirilməsi imkanlarını genişləndirir. Qeyd olunub ki, bu yanaşma mütəxəssislərə daha ölçülə bilən, sistemli və effektiv müdaxilə mexanizmləri təqdim edir.

Görüş zamanı tərəflər autizm sahəsində elmi-tədqiqat, rəqəmsal reabilitasiya texnologiyaları, mütəxəssis hazırlığı, həmçinin innovativ proqram təminatının xüsusi təhsildə tətbiqi istiqamətində əməkdaşlıq imkanlarını müzakirə etmişlər. Xüsusilə region ölkələri arasında texnologiya əsaslı reabilitasiya modellərinin inkişafı və birgə beynəlxalq layihələrin hazırlanmasının əhəmiyyəti vurğulanmışdır.

Azərbaycan Autizm Assosiasiyasının nümayəndə heyəti universitetin elmi-tədqiqat infrastrukturu və innovasiya mühiti ilə tanış olmuş, autizm sahəsində süni intellekt və proqram təminatına əsaslanan həllərin gələcək əməkdaşlıq üçün geniş perspektivlər açdığı qeyd edilmişdir.

Görüşün yekununda tərəflər autizm sahəsində birgə layihələrin hazırlanması, təcrübə mübadiləsi, elmi əməkdaşlığın genişləndirilməsi və beynəlxalq təşəbbüslərdə ortaq iştirak istiqamətində əlaqələrin davam etdirilməsi barədə razılığa gəlmişlər.