Media və QHT
Tələbələrin sosiallaşma problemlərinə həsr olunan tədbir keçirilib
“Demokratiyanın İnkişafı Problemləri Mərkəzi” İctimai Birliyi icra etdiyi “Tələbələrin sosiallaşması problemlərinin araşdırılması: mövcud reallıqlar və problemlər” adlı layihə çərçivəsində tədbir təşkil edib. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilir.
“Demokratiyanın İnkişafı Problemləri Mərkəzi” İctimai Birliyinin sədri və layihənin rəhbəri Mütəllim Rəhimov tədbiri açaraq layihənin məqsədi barədə məlumat verib. Onun bildirdiyinə görə, layihənin məqsədi universitetlərdə təhsil alan tələbələrin sosiallaşmasına təsir edən problemləri aşkarlamaq və onların cəmiyyətə inteqrasiyasına dəstək verməkdir. M.Rəhimov deyib ki, ölkəmizin iqtisadiyyatında, siyasətində və vətəndaşlarının sosial həyatında baş verən əsaslı dəyişikliklərlə əlaqədar olaraq tələbələrin sosiallaşması məsələsi getdikcə aktuallaşır. Çünki şəxsiyyət açıq, dəyişən bir sistemdir.
İctimai Birliyin sədri qeyd edib ki, tələbələrin sosiallaşması xüsusi əhəmiyyət kəsb edir, çünki müasir insan sosial təzyiqə uyğunlaşmağa, daxili və xarici dəyərləri balanslaşdırmağa çalışır.
Layihənin eksperti, dosent Günay Hüseyn çıxış edərək bildirib ki, tələbələr Azərbaycan gənclərinin əhəmiyyətli bir alt qrupunu təmsil edir. Azərbaycan tələbə-gənclərinin sosiallaşma trayektoriyaları daim dəyişikliklərə məruz qalır. Bu trayektoriyalar azərbaycanlıların tarixi, sosial və milli köklərinin ifadəsi kimi daxili birlik potensialını saxlamaqla yanaşı, yeni xüsusiyyətlər qazanır.
Ekspert çıxışı zamanı diqqəti tələbə adını qazanmış gəncin şəxsi inkişafında univerisitetin etibarlı dayağa çevrilməli olduğuna yönəldib. O deyib ki, burada tələbə mədəniyyətlə digər fərdlərin kollektiv təcrübəsi kimi tanış olur və bir fərd kimi özünü öyrənir. Universitet tələbənin özünü həyata hazırlaması üçün mənalar və şəxsi inkişaf yollarının axtarışı sahəsinə çevrilir. Ali təhsilin dəyişdirici gücü ondan ibarətdir ki, universitet tələbəyə onun özü və ətrafındakı dünya haqqında təsəvvürünü dəyişdirən biliklər verir. Amma tələbə maraqlanmalı, seçdiyi təhsil sahəsində öyrənməyə cəlb edilməli, universitetdə təhsil almağı dəyərli təhsil təcrübəsi kimi qəbul etməlidir. Əks halda, şəxsi transformasiya baş verə bilməz.
“Aparılan araşdırma və edilən təhlil nəticəsində Azərbaycan universitetlərində tələbələrin sosiallaşmasının zəif tərəfləri göstərilir. Bununla bağlı müvafiq tövsiyyə və təkliflər hazırlanmaqdadır” – ekspert G.Hüseyn çıxışı zamanı qeyd edib.
“İqtisadiyyat” kafedrasının müdiri, dosent Vüsalə Nağıyeva təhsilin tələbəyə qazandırdığı bacarıq və dəyərlərdən bəhs edib. O deyib ki, müasir informasiya texnologiyalarından istifadə bacarıqları kimi biliklərə malik olmaq hələ tələbələrin doğru-düzgün sosiallaşması demək deyil.
“Biznes və Menecment” kafedrasının müdiri, dosent Mətanət Qurbanova isə qeyd edib ki, əgər əvvəllər təhsil almayanları sosiallaşma prosesində gərginlik və çətinlik yaşayan kimi xarakterizə etmək mümkün idisə, indi ali təhsilli şəxslərin sosiallaşması və ya asosiallığı haqqında fikir irəli sürmək mümkündür.
“Humanitar fənlər və regionşünaslıq” kafedrasının müəllimi Reşad Əbilzadə, sosioloq Nəzrin Bayramzadə, psixoloq Yaqut Ağasıyeva sosiallaşmanın ali təhsilə gətirə biləcəyi kəmiyyət və keyfiyyət dəyişkənlikləri, üstünlükləri, prosesə qoşulmamağın doğuracağı acı nəticələr və s. haqqında danışıblar.
Daha sonra müzakirələr davam edib və tələbələr də müzakirə olunan məsələ ilə bağlı öz fikirlərini açıqlayıblar.
11:03 01.07.2025
Oxunuş sayı: 1342
