Mətbuat Şurasının təşkilatçılığı ilə BDU-da seminar keçirilib
Azərbaycan Mətbuat Şurasının təşkilatçılığı ilə Azərbaycan Dillər Universitetinin (ADU) istehsalat təcrübəsində olan bir qrup tələbəsi üçün Bakı Dövlət Universitetində (BDU) seminar təşkil olunub. Seminarda BDU-nun Jurnalistika fakültəsinin bir sıra tanınmış simaları və müəllim heyəti iştirak edərək tələbələrlə təcrübə və biliklərini paylaşıblar.
Seminarın açılışında Bakı Dövlət Universitetinin Jurnalistika fakültəsinin dekanı, Azərbaycan Mətbuat Şurası Sədrinin müavini Vüqar Zifəroğlu çıxış edərək belə tədbirlərin gələcək jurnalistlərin formalaşmasında oynadığı rolu xüsusi vurğulayıb. Onun sözlərinə görə, Jurnalistika fakültəsi tələbələrə yalnız nəzəri bilik verməklə kifayətlənmir, eyni zamanda onları real media mühitinə hazırlamaq üçün praktik imkanlar da təqdim edir.
Daha sonra Sosial məsələlər və tələbələrlə iş üzrə dekan müavini Samir Mirzəyev çıxış edərək gələcəyin jurnalistləri üçün belə görüşlərin əhəmiyyətindən danışıb.
Tədbirdə Milli Mətbuat Tarixi kafedrasının müdiri, professor Cahangir Məmmədli çıxış edərək, jurnalistikanın təməlində bədii ədəbiyyatın dayandığını vurğulayıb. O, tələbələrə ədəbi dilin və bədii düşüncənin jurnalist peşəsinin inkişafında oynadığı rolu çatdırıb.
Beynəlxalq Jurnalistika və İnformasiya Siyasəti kafedrasının müdiri, Aynur Nəsirova isə jurnalistikada araşdırma aparmağın əhəmiyyəti və geniş dünyagörüşünün zəruriliyi haqqında danışıb. O, həmçinin filologiya və jurnalistika sahələri arasında olan yaxın əlaqəyə toxunaraq, bu sahələrin bir-birini tamamladığını qeyd edib.
Multimedia və Elektron Kommunikasiya kafedrasının müdiri, professor Qulu Məhərrəmli də seminar çərçivəsində tələbələrlə görüşərək jurnalistika və media etikası mövzusunda geniş müzakirə aparıb. O, medianın ictimai məsuliyyət daşıdığını vurğulayaraq, tələbələri etik prinsiplərə sadiq olmağa çağırıb.
Yeni Media və Kommunikasiya Nəzəriyyəsi kafedrasının müdiri, Xatirə Hüseynova da tədbirdə iştirak edərək seminarın interaktiv xarakter daşımasına töhfə verərək tələbələrin 1-ci kursdan şəxsi inkişaflarına investisya etməsini tövsiyə edib.
Seminar çərçivəsində Samir Mirzəyev tələbələri Jurnalistika fakültəsinin nəzdində yaradılmış bir sıra xüsusi mərkəz və otaqlarla tanış edib. Bunlara ARB24 otağı, “Xalq qəzeti” debat otağı, Mətbuat Şurası guşəsi, “Füyuzat” Mətn Mərkəzi, “Newslab” laboratoriyası və Media Agentliyinin xüsusi auditoriyası daxildir. Bu mərkəzlərin fəaliyyəti barədə tələbələrə ətraflı məlumat verilib.
Bundan əlavə, Tədris Teleradio Studiyasının sədri Ramin Rzayev də tələbələrlə görüşərək onları BDU TV, radio otağı və montaj otağı ilə tanış edib. O, studiyanın fəaliyyəti, tələbələrin burada həyata keçirilən praktik yayım və montaj proseslərində iştirakı haqqında ətraflı məlumat verib.
Seminar boyu tələbələrin sualları cavablandırılıb, qarşılıqlı müzakirələr aparılıb.
Seminarın sonunda tələbələr tədbirin onlarda yaratdığı təəssüratlardan razı qaldıqlarını, belə görüşlərin onların peşəkar formalaşmasına müsbət təsir etdiyini və dərin minnətdarlığını bildiriblər.
İnarə Hünbətova
19:06 09.04.2025
Oxunuş sayı: 4812
