“CNN Türk” televiziyası Qərbi Azərbaycana qayıdış mövzusunda reportaj hazırlayıb
Türkiyənin “CNN Türk” xəbər kanalı azərbaycanlıların Qərbi Azərbaycandakı tarixi torpaqlarına qayıdışı mövzusunda reportaj hazırlayıb. Telekanal tamaşaçıların diqqətini Bakı və İrəvan arasında aparılan sülh danışıqlarına və Qərbi Azərbaycan məsələsində tarixi ədalətin bərpası ilə bağlı Azərbaycan rəhbərliyinin mövqeyinə yönəldib.
Reportaj zamanı Qərbi Azərbaycanın xəritəsi təqdim edilib, rus rəssamı Frans Rubonun çox sayda minarələrlə əhatə olunmuş İrəvan qalasının ələ keçirilmə səhnəsini təsvir edən rəsm əsəri, həmçinin, ermənilər tərəfindən şəhərin tarixi simasını məhv etmək məqsədilə dağıdılmış İrəvan qalasının divarlarının qalıqları və digər irs abidələri nümayiş etdirilib.
Reportajda Türkiyənin "Beykoz" Universitetinin professoru Raqıp Kutay Karacanın da ekspert rəyi yer alıb. O vurğulayıb ki, müasir Ermənistan azərbaycanlıların tarixi torpaqlarında yaradılıb.
"Bugünkü Ermənistan ərazisində bir zamanlar yüz minlərlə azərbaycanlı yaşayıb", – deyə ekspert bildirib və qeyd edib ki, Cənubi Qafqazın Çar Rusiyasının nəzarəti altına keçməsindən sonra bölgənin demoqrafik vəziyyəti dəyişməyə başlayıb.
"O dövrdə azərbaycanlıların yaşadığı ərazilərə kütləvi şəkildə ermənilər yerləşdirilib, eyni zamanda toponimlər dəyişdirilib. Addım-addım Qərbi Azərbaycanın tarixi və mədəni irsi, o cümlədən qəbiristanlıqlar və məscidlər məhv edilib", – deyə professor əlavə edib və xatırladıb ki, 19-cu əsrin sonlarında İrəvan ərazisində 12 məscid fəaliyyət göstərib, lakin bu gün yalnız biri – Göy məscid qalıb.
Professor, həmçinin, sovet hakimiyyəti dövründə azərbaycanlıların müasir Ermənistan ərazisindən deportasiyaya məruz qalmasını nəzərə çatdırıb və onların tarixi haqlarını bərpa etmək arzularından danışıb. (Azərtac)
09:04 11.03.2025
Oxunuş sayı: 1615
