Ersin Tatar Kiprdə ədalətli və davamlı sülhün şərtlərini bəyan edib
“Kiprdə ədalətli və uzunmüddətli sülhün yolu kipr türklərinin milli kimlik və dövlətçilik hüququnun tanınmasından keçir”. Bunu Şimali Kipr Türk Respublikasının (ŞKTR) Prezidenti Ersin Tatar “Kıbrıs Postası TV” televiziyasının efirində söyləyib.
Onun sözlərinə görə, ŞKTR-ın təhlükəsizliyinin təminatçısı kimi Türkiyənin rolu əvvəlkindən daha önəmlidir. “Türkiyə ordusu təhlükəsizliyimizi təmin etmək üçün adada yerləşdirilməyə davam edəcək”, – deyə Ersin Tatar vurğulayıb.
Siyasətçi ŞKTR-ın suveren və müstəqil dövlət kimi Avropa İttifaqına daxil olmasını istisna etməyib. Ersin Tatar, türk Kipri ilə adanın yunan icması arasındakı sərhəddə 9 keçid məntəqəsinin mövcudluğuna diqqət çəkib. “Bu keçid məntəqələri vasitəsilə sərhədi keçmə hallarının sayı 8 milyona çatıb və bu, son göstərici deyil. Biz Kiprin hər iki xalqının maraqlarına töhfə verməyə hazırıq”, – deyə kipr türklərinin lideri bildirib.
ŞKTR-ın prezidenti Kiprin federativ quruluşu məsələsinin müzakirəsinin uzun illərdir nəticəsiz qaldığını xatırladıb. “Yunan icması Kipr Respublikası deyil. Qarşımızda dünya birliyinin tanımağa davam etdiyi tamamilə fərqli bir dövlət qurumu var. Bizim xəbərimiz olmadan neft və müdafiə sahələrində sazişlər imzalanır. Bütün bunlar ŞKTR Konstitusiyasına ziddir”, – deyə siyasətçi qeyd edib.
Ersin Tatar Türkiyə Prezidenti Rəcəb Tayyib Ərdoğanın BMT tribunasından ŞKTR-a qarşı sanksiyaların aradan qaldırılması çağırışını yüksək qiymətləndirib. “Son illərdə Azərbaycana səfərlər həyata keçirilib. Lefkoşa Türk Dövlətləri Təşkilatına müşahidəçi qismində qəbul edilib. Yolumuzda maneələr ola bilər, lakin fakt budur ki, ŞKTR bu gün nazirlik səviyyəsində görüşlərə və iclaslara tamhüquqlu dövlət kimi dəvət olunur. Bütün bunlar türk Kiprinin statusunu artırır”, – deyə Prezident vurğulayıb.
Sonda Ersin Tatar ŞKTR prezidenti vəzifəsinə yenidən namizədliyini irəli sürməyi planlaşdırdığını açıqlayıb.
06:34 05.03.2025
Oxunuş sayı: 1442
