İndoneziya gəncləri Xocalı faciəsi ilə bağlı bəyanat yayıblar
İndoneziya Milli Gənclər Şurası və bu ölkənin ən böyük gənclər təşkilatlarından olan İndoneziya İƏT Gənclər Təşkilatı Xocalı faciəsinin 33-cü ildönümü ilə bağlı bəyanatla çıxış edib.
Bəyanatda 1992-ci il fevralın 25-dən 26-na keçən gecə erməni silahlı birləşmələrinin Xocalıya hücumu nəticəsində uşaqlar, qadınlar və ahıllar da daxil olmaqla 613 nəfərin qətlə yetirildiyi, sakinlərin yurdlarından qovulduqları vurğulanıb. Qeyd olunub ki, Xocalı qırğını beynəlxalq qanunların, o cümlədən 1949-cu il Cenevrə Konvensiyasının, Soyqırımı Konvensiyasının, Uşaqların Hüquqlarına dair Konvensiyanın tələblərini pozub.
Bəyanatda deyilir ki, Heydər Əliyev Fondunun “Xocalıya ədalət!” kampaniyası kütləvi qətliam barədə dünya ictimaiyyətinin məlumatlılığının artırılmasına, onun soyqırımı kimi tanınmasına yönəlib. Bu günə qədər 18 ölkə, ABŞ-ın 24 ştatı, İslam əməkdaşlıq Təşkilatı (İƏT) və Türk Dövlətləri Təşkilatı (TDT) kütləvi qətliamı soyqırımı kimi tanıyıb və ya qətlləri pisləyib.
Hər iki təşkilat Leyla Əliyevanın təşəbbüsü ilə 2008-ci ildə başladılan “Xocalıya ədalət!-Qarabağa azadlıq!” beynəlxalq kampaniyasında iştirak etdiyini vurğulayıb, indoneziyalı gəncləri Xocalı soyqırımı ilə əlaqədar qardaş Azərbaycan xalqı ilə həmrəylik göstərməyə, Ermənistan ordusunun törətdiyi vəhşiliklər barədə məlumatlılığı artırmağa çağırıb.
Qeyd edək ki, Xocalı soyqırımının ildönümü ilə əlaqədar İndoneziyanın nüfuzlu media qurumlarından olan “Radio Republik Indonesia” (IPR) və “Mi’raj” Xəbər Agentliyi (MINA), habelə Filippinin populyar “The Manila Times” qəzetlərində məqalələr dərc olunub. (Azərtac)
00:13 27.02.2025
Oxunuş sayı: 4242
