Ərəb mediası Xocalı soyqırımından yazır
“Əl-Aləm əl-arabi”, “Tariq əl-hərir” və “wwnewss” xəbər saytlarında Azərbaycan və Türkiyə üzrə misirli tədqiqatçı Əsma Əhməd Bihairinin “Xocalı qətliamı: Bəşəriyyətə qarşı unudulmayacaq cinayət” sərlövhəli məqaləsi dərc edilib. Məqalədə Xocalı faciəsinin baş vermə səbəblərinə diqqət yetirilir, onun adi faciə deyil, həm də müharibənin və etnik təmizləmənin vəhşiliyini göstərən insanlıq əleyhinə cinayət olduğu vurğulanır.
Müəllif qeyd edir ki, Xocalıda baş verən soyqırımı təkcə şəhər sakinlərinə deyil, bütün Azərbaycan xalqına qarşı yönəlmişdi, insanlıq tarixində ən dəhşətli zorakılıq və vəhşilik nümunələrindən biri idi. Bu, bütün bəşəriyyətə qarşı törədilmiş soyqırımı cinayəti idi.
Bildirilir ki, 1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüququn norma və prinsiplərini kobudcasına pozaraq keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücum edib və dinc əhaliyə misli görünməmiş qəddarlıqla divan tutub. Xocalı soyqırımı zamanı 106 qadın, 63 uşaq, 70 qoca olmaqla, 613 şəxs məhz azərbaycanlı olduqlarına görə ağlasığmaz vəhşiliklərlə qətlə yetirilib, 487 dinc sakin ağır yaralanıb, 1275 nəfər isə girov götürülüb.
Qətliamdan 33 il ötür. Azərbaycan xalqı Xocalı qurbanları üçün ədalətin təmin olunmasını tələb edir. Bir çox dövlətlər və bir sıra ölkələrin parlamentləri və beynəlxalq təşkilatlar, o cümlədən İslam Əməkdaşlıq Təşkilatı bu qətliamı soyqırımı kimi tanıyıb.
Bu hüznlü ildönümündə şəhid ailələrinə və Azərbaycan xalqına dərin hüznlə başsağlığı verən misirli tədqiqatçı Azərbaycan xalqı ilə tam həmrəyliyini ifadə edib. Vurğulayıb ki, Xocalı qətliamı qurbanlarının xatirəsini anmaqla təkcə keçmişi yada salmırıq, həm də ədalətin təmin olunmasının və insanlığa qarşı bu cinayətlərin bir daha təkrarlanmamasının vacibliyini vurğulamış oluruq. (Azərtac)
13:43 26.02.2025
Oxunuş sayı: 3212
