Pekin: Çin Panama kanalına müdaxilə etməyib
Çin bəyan edib ki, Panama kanalına heç vaxt müdaxilə etməyib. Pekində Çin Xarici İşlər Nazirliyinin sözçüsü Mao Nin jurnalistlərə bildirib: “Çin Panama Kanalının idarə olunmasına və ya əməliyyatlarına qarışmayıb. Panamanın kanal üzərindəki suverenliyini tanıyır və onu daimi neytral beynəlxalq su yolu kimi qəbul edir”.
Bu bəyanat, ABŞ-nin yeni and içmiş prezidenti Donald Trampın kanalı ələ keçirmək təhdidlərinə cavab olaraq verilib. Tramp ABŞ-nin Panama kanalını “yenidən ələ keçirəcəyini” bəyan edib. Ötən ay Tramp iddia edib ki, “Çinin möhtəşəm əsgərləri” Panama kanalını “sevgi ilə, lakin qanunsuz şəkildə” idarə edir. O, həmçinin Panama kanalının tranziti üçün yüksək tarifləri tənqid edib və 1999-cu ildə kanalın idarəetməsinin Panamaya ötürülməsinin əməkdaşlıq jesti kimi nəzərdə tutulduğunu, güzəşt olmadığını iddia edib.
Panama Prezidenti Xose Raul Mulino bu bəyanatlara cavab olaraq bildirib ki, kanalın mülkiyyəti müzakirə olunmazdır. Mulino vurğulayıb ki, Panama kanalı tamamilə Panamanın nəzarəti altındadır və Çinin heç bir əməliyyat rolu yoxdur. “Kanalda çinlilər yoxdur. Sadəcə bu qədər. Nə çinlilər, nə də başqa bir güc kanalda iştirak edir,” – deyə o bildirib və əlavə edib ki, ərazidə hər hansı Çin təşkilatının iştirakı yalnız turistlər və ya kruiz gəmisindəki sərnişinlərlə məhdudlaşıb.
Atlantik və Sakit okeanları birləşdirən mühüm ticarət marşrutu olan Panama kanalı tamamilə Panamanın idarəsindədir. Kanalın girişlərində yerləşən iki limanı Honq-Konqda yerləşən bir şirkət idarə etsə də, Mulino bunun kanalın əməliyyatlarına Çin təsiri kimi qəbul edilməməli olduğunu vurğulayıb.
Nərgiz Camalzadə
17:04 22.01.2025
Oxunuş sayı: 722
