“TikTok” fəaliyyətini dayandıra bilər
Çin mərkəzli “ByteDance” şirkətinə məxsus “TikTok”, uzun müddətdir ABŞ hökuməti ilə milli təhlükəsizlik səbəbi ilə mübahisə içindədir. Amerika rəsmiləri tətbiqin istifadəçi məlumatlarını Çin hökuməti ilə paylaşa biləcəyini və bunun bir təhlükəsizlik riski yaratdığını iddia edirlər. Lakin “TikTok” və “ByteDance” bu iddiaları rədd edərək hər hansı məlumat paylaşımının olmadığını bildirirlər.
19 yanvar 2025-ci il tarixində qüvvəyə minəcək bir qanun, platformanın ABŞ-dakı fəaliyyətlərini dayandıracaq və ya “ByteDance”in “TikTok”u ABŞ-da yerləşən bir şirkətə satmasını məcburi edəcək. Bu qanunun ləğvi üçün müraciət edən “TikTok”, “Əgər bu qanun qüvvəyə minsə, tətbiqimiz 170 milyondan çox amerikalı istifadəçimiz üçün bağlanacaq,” deyə açıqlama verib və Ali Məhkəmənin qərarını gözləyir.
“TikTok” qadağası yalnız şirkəti deyil, milyonlarla istifadəçini və məzmun istehsalçılarını da təsir edir. Çoxlu məzmun istehsalçıları dolanışıq vasitələrini itirmək riski ilə üzləşiblər. Əgər platforma bağlanarsa, istifadəçilər və məzmun istehsalçıları alternativ platformalara yönəlmək məcburiyyətində qalacaqlar.
Platformanın taleyi, ABŞ Ali Məhkəməsinin yaxın günlərdə verəcəyi qərarla dəqiqləşəcək. Lakin artıq indidən şirkətin bu nöqtəyə gəlməsi, sosial media dövründə milli təhlükəsizlik və ifadə azadlığı arasındakı münaqişənin nə qədər dərinləşdiyini göstərir.
Nərgiz Camalzadə
09:00 10.01.2025
Oxunuş sayı: 7443
