Siciliya mafiyasının liderləri azad edilib: Əhali narahatdır
Son üç ayda Siciliya mafiyasına bağlı 20-dən çox yüksək səviyyəli mafioz həbsdən azad edilib. Bu hadisə qurbanların ailələrində narahatlıq yaradıb. Onlar bu şəxslərin bir vaxtlar nəzarət etdikləri məhəllələrə qayıdaraq mafiya fəaliyyətlərini yenidən bərpa edə biləcəyindən qorxurlar.
Azad olunanlar arasında Palermodakı məşhur mafiya ailələrinin liderləri də var. Onlar Siciliya mafiyası, yəni “Cosa Nostra” ilə əlaqələrini heç vaxt inkar etməyiblər və məhkəmə orqanları ilə əməkdaşlıq etməkdən həmişə imtina ediblər. Əksəriyyəti yaxşı davranış və ya şərti azadlıq səbəbindən həbsdən çıxıb.
1992-ci ildə mafiyanın öldürdüyü məşhur antimafiya hakimi Paolo Borsellinonun qardaşı Salvatore Borsellino bildirib ki, belə şəxslərin azadlığa buraxılması çox təhlükəlidir. Onun fikrincə, bu addım mafiyaya qarşı mübarizəni zəiflədir.
1989-cu ildə həyat yoldaşı ilə birlikdə qətlə yetirilmiş polis əməkdaşı Nino Aqostinonun qohumu Nino Morana Aqostino da bu qərardan narazıdır. O bildirib ki, bu mafiozlar açılmamış cinayətlərə dair çoxlu sirr bilir, lakin bu məlumatları paylaşmaqdan imtina edirlər. Onun sözlərinə görə, bu şəxslərin sərbəst buraxılması ictimaiyyət üçün yanlış mesajdır.
Misal olaraq, Palermonun Acquasanta məhəlləsinin keçmiş mafiya başçısı Raffaele Qalatolo oktyabr ayında yaxşı davranışına görə şərti azadlığa buraxılıb. O, əvvəllər mafiyanın “ölüm otağı” adlanan bir məkanına nəzarət edirdi. Bu otaqda qurbanlar boğularaq öldürülürdü. Qalatolo, mafiyanın keçmiş rəhbəri Toto Riinanın əmri ilə bu fəaliyyətləri həyata keçirirdi.
Son dövrlərdə mafiyanın rəhbərliyi ilə əlaqəli olan digər şəxslər də azad edilib. Bu, prokurorları və qurbanların ailələrini narahat edir. Onların fikrincə, bu şəxslərin həbsdən çıxması mafiyanın yenidən təşkil olunmasına şərait yarada bilər. Palermo və Trapani kimi bölgələrdə, xüsusən də mafiya rəhbərlərinin bir çoxu həbsdən sonra köhnə fəaliyyətlərinə qayıda bilər. Bu vəziyyət, həmçinin cəmiyyətə cəzasızlıq mesajı göndərə bilər.
Kriminoloq Federiko Varese qeyd edib ki, İtaliya qanunvericiliyində edilən dəyişikliklər mafiozlara “yaxşı davranış” adı altında azad olunmaq imkanı yaradır. Həbsxana rəhbərləri isə prokurorlarla məsləhətləşmədən belə qərarlar qəbul edirlər. Varese-nin fikrincə, bu, mafiyanın yenidən güclənməsinə gətirib çıxara bilər.
Siciliya mafiyası ilə bağlı ən böyük problem ondan ibarətdir ki, bu qruplara üzv olanlar heç vaxt keçmiş əməllərindən imtina etmirlər. Onlar təşkilatdan yalnız ölüm və ya dövlət şahidi olmaqla çıxırlar. Bu isə təşkilatın daha da güclənməsinə səbəb olur.
Ekspertlər və ailələr mafiyaya qarşı mübarizənin davam etdirilməsinin vacib olduğunu vurğulayırlar. Dövlətin bu məsələ ilə ciddi şəkildə məşğul olması tələb edilir.
Gülay Qəribova
15:32 03.01.2025
Oxunuş sayı: 5088
