Yeni Orleanda faciə: Burbon küçəsində yük maşını kütləyə çırpıldı
Yeni Orleanda Burbon küçəsində avtomobilin kütlənin üzərinə çıxması nəticəsində ilkin məlumatlara görə, 10 nəfər həlak olub, daha 30 nəfər yaralanıb.
Yeni Orlean polisi insidentin yerli sakinlər və turistlər arasında populyar olan bu sıx küçədə baş verdiyini təsdiqləyib.
CNN-in məlumatına görə, hadisə yerinə gələn fövqəladə xidmət əməkdaşları baş verənləri “kütləvi insan itkisi” kimi qiymətləndiriblər.
Yeni Orleanın fövqəladə vəziyyət idarəsi NOLA Ready yaralananların yaxınlıqdakı xəstəxanalara aparıldığını bildirib və sakinləri hadisə yerindən uzaq durmağa çağırıb.
2025-ci ilin ilk günündə baş verən faciənin şahidləri bayram əhval-ruhiyyəsinin necə faciəyə çevrildiyini təsvir ediblər.
“Burbon küçəsində sol tərəfdə, səkiyə yaxın dayanan insanları yüksək sürətlə vuran yük maşını gördüm,” - deyə 22 yaşlı Kevin Qarsiya CNN-ə açıqlama verib.
Başqa bir şahid, Uit Devis isə panika anını belə təsvir edib: “Hamı qışqırmağa, geri qaçmağa başladı. Əvvəlcə hər kəs donub qalmışdı, amma sonra vəziyyət bir qədər sakitləşdi.”
14:17 01.01.2025
Oxunuş sayı: 7102
