Hadisə

Dünya Azərbaycanlılarının Həmrəylik Günü milli birlik və zəfər simvoludur

Hər il dekabrın 31-i dünya azərbaycanlılarının milli birlik, həmrəylik və mənəvi yaxınlıq simvolu olan Həmrəylik Günü kimi qeyd olunur. Bu gün Azərbaycanın dövlət müstəqilliyi, milli kimliyi və qlobal miqyasda soydaşlarımızın həmrəyliyini daha da gücləndirən mühüm bir tarixi hadisədir. Ulu öndər Heydər Əliyevin uzaqgörən siyasəti ilə təsis edilən və Prezident İlham Əliyevin uğurlu fəaliyyəti ilə inkişaf etdirilən bu gün milli dəyərlərimizi təcəssüm etdirir.

Qeyd edək ki, 1991-ci ilin dekabrın 16-da hələ Naxçıvan Muxtar Respublikası Ali Məclisinin sədri olmuş ulu öndər Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan etmişdi. Ulu öndər Heydər Əliyev dünya azərbaycanlılarının milli həmrəylik ideyasının təşəbbüskarı və həyata keçirilməsində əsas rol oynayan şəxsiyyətdir. Onun uzaqgörən siyasəti nəticəsində dünya azərbaycanlıları birləşərək həm öz aralarında, həm də Vətənlə daha sıx əlaqələr qurmuşlar. Ümummilli lider Heydər Əliyev hər zaman vurğulamışdır ki, milli birliyimiz Azərbaycan xalqının gücünün əsasıdır. Bu tarixi addım soydaşlarımız arasında milli mənsubiyyət hissini gücləndirmiş və dünya azərbaycanlılarını vahid ideya ətrafında birləşdirmişdir. Onun bu sahədəki siyasəti həm də diaspor təşkilatlarının yaradılması və fəaliyyətinin genişlənməsinə böyük təkan vermişdir. Ulu öndər Heydər Əliyevin rəhbərliyi ilə formalaşdırılan milli həmrəylik siyasəti yalnız ölkə daxilində deyil, xaricdə yaşayan azərbaycanlılar arasında da öz bəhrəsini vermişdir. Onun dünya azərbaycanlılarına ünvanladığı mesajlar milli birliyin və həmrəyliyin əhəmiyyətini hər kəsə çatdırmışdır. Heydər Əliyevin siyasi irsi bu gün də Azərbaycan rəhbərliyinin prioritet istiqaməti kimi qorunub saxlanılır və inkişaf etdirilir. Ulu öndər Heydər Əliyevin dünya azərbaycanlılarının həmrəyliyindəki tarixi rolu, onun milli maraqların müdafiəsindəki qətiyyəti və uzaqgörən siyasəti xalqımızın qürur mənbəyidir. Bu siyasət gələcək nəsillər üçün örnək olaraq qalacaq.

1993-cü ildə ulu öndər Heydər Əliyevin xalqımızın təkidli tələbi ilə hakimiyyətə qayıdışı ilə milli həmrəylik siyasəti daha da inkişaf etdirildi. Ulu öndər bu günün yalnız bir bayram deyil, həm də dünya azərbaycanlılarının milli mənsubiyyətlərini qorumaq, tarixi yaddaşlarını gücləndirmək və Azərbaycanı beynəlxalq arenada tanıtmaq üçün bir vasitə olmasını təmin etdi. Heydər Əliyevin dünya azərbaycanlılarına ünvanladığı müraciətlərdə hər zaman birliyimizin və həmrəyliyimizin Azərbaycan xalqının gücünün təməli olduğu vurğulanırdı.

Prezident cənab İlham Əliyevin rəhbərliyi altında milli həmrəylik siyasəti yeni bir mərhələyə qədəm qoyub. Cənab İlham Əliyev dünya azərbaycanlılarının maraqlarını müdafiə edən və onların vahid platforma ətrafında birləşməsini təmin edən müxtəlif təşəbbüslərlə çıxış edib. Dünya Azərbaycanlılarının Qurultaylarının keçirilməsi bu siyasətin mühüm komponentlərindən biridir. Bu qurultaylar dünya azərbaycanlılarını bir araya gətirərək, onların milli maraqlarını müzakirə etmək və müştərək layihələr həyata keçirmək üçün əhəmiyyətli bir platforma olub.

Prezident İlham Əliyevin rəhbərliyi ilə diaspor təşkilatlarının yaradılması və fəaliyyətinin genişləndirilməsi dünya azərbaycanlılarının həmrəyliyinə böyük töhfə verib. Xüsusilə, Vətən müharibəsi dövründə dünya azərbaycanlılarının göstərdiyi həmrəylik və dəstək Prezident cənab İlham Əliyevin uzaqgörən siyasətinin nəticəsi kimi dəyərləndirilir.

Birinci vitse-prezident Mehriban xanım Əliyeva da dünya azərbaycanlılarının milli həmrəylik ideyasına böyük töhfələr vermişdir. Mehriban xanımın rəhbərliyi ilə Heydər Əliyev Fondu milli-mədəni irsimizin qorunması, dünyada Azərbaycan həqiqətlərinin təbliği və soydaşlarımızın həmrəyliyinin gücləndirilməsi istiqamətində əhəmiyyətli işlər görmüşdür. Bu fəaliyyətlər yalnız mədəniyyət sahəsində deyil, həm də milli həmrəylik və soydaşlarımızın milli mənsubiyyət hissinin gücləndirilməsi istiqamətində mühüm əhəmiyyətə malikdir. Mehriban xanım Əliyevanın təşəbbüsü ilə həyata keçirilən xeyriyyə layihələri də dünya azərbaycanlıları arasında birliyin gücləndirilməsinə xidmət edir.

Dünya Azərbaycanlılarının Həmrəylik Günü yalnız milli birlik bayramı deyil, həm də xalqımızın gücünü və birliyini nümayiş etdirən simvolik bir gündür. Milli həmrəylik Azərbaycan xalqının müstəqilliyini qoruyub saxlamaqda və qlobal arenada öz mövqeyini möhkəmləndirməkdə mühüm rol oynayır.

Xüsusilə, Müzəffər Ali Baş Komandan cənab İlham Əliyevin rəhbərliyi ilə 44 günlük Vətən müharibəsi dövründə, eləcə də, əldə olunan tarixi Zəfərlərdə dünya azərbaycanlılarının birliyi və həmrəyliyini açıq şəkildə göstərdi. Bu müddət ərzində dünya azərbaycanlıları maddi və mənəvi dəstək göstərərək, Azərbaycanın haqq işini beynəlxalq səviyyədə müdafiə etdilər.

Həmrəylik yalnız dövlətin deyil, hər bir azərbaycanlının vəzifəsidir. Bu gün dünya azərbaycanlıları arasında həmrəyliyin daha da gücləndirilməsi, onların mədəni, sosial və iqtisadi fəaliyyətlərinin əlaqələndirilməsi dövlət siyasətinin prioritet istiqamətlərindən biridir.

Dünya Azərbaycanlılarının Həmrəylik Günü milli kimliyimizin, tariximizin və birliyimizin simvoludur. Bu gün Ulu öndər Heydər Əliyevin uzaqgörən siyasətinin bəhrəsi, Prezident İlham Əliyevin uğurlu rəhbərliyinin davamı və Mehriban xanım Əliyevanın mədəniyyətimizin və dəyərlərimizin qorunması istiqamətindəki yorulmaz fəaliyyətinin nəticəsidir.

Milli həmrəylik Azərbaycan xalqının ən böyük sərvətidir. Bu gün bizə yalnız tariximizi xatırlatmaqla kifayətlənmir, həm də gələcəyə birlikdə baxmağın vacibliyini göstərir. Həmrəyliyimiz gücümüz, birliyimiz isə zəfərimizin qarantıdır. Hər bir azərbaycanlı bu günlə fəxr edir və öz milli kimliyini daha da gücləndirmək üçün çalışır.

Qarşıdan gələn Dünya Azərbaycanlılarının Həmrəylik Günü münasibətilə bütün azərbaycanlıları təbrik edirəm.