Niyə məhz Pakistan? - ABŞ-İran görüşü bu ünvanda keçiriləcək?
ABŞ və İran nümayəndələrinin mümkün görüşü üçün Pakistanın seçilməsi ilə bağlı yayılan məlumatlar regionda yeni diplomatik dinamikanın formalaşdığını göstərir.
Bu barədə açıqlama verən Vadeful platformasının məlumatı xüsusilə diqqət çəkir. Uzun müddətdir gərgin münasibətlər fonunda Vaşinqton və Tehran arasında birbaşa və ya dolayı təmasların hansı platformada baş tutacağı hər zaman mühüm məsələ olub.
Bu kontekstdə Pakistanın potensial görüş məkanı kimi önə çıxması təsadüfi görünmür. Belə ki, Pakistan həm ABŞ, həm də İranla müəyyən balanslı münasibətlərə malik nadir ölkələrdən biridir və bu da onu mümkün dialoq üçün uyğun platformaya çevirir.
Bəs niyə məhz Pakistan seçilir?
Bu görüşdən gözləntilər nədir və tərəflər hansı real nəticələr əldə edə bilər? Bu suallar hazırda beynəlxalq gündəmin ən aktual müzakirə mövzularından birinə çevrilib.
Mövzu ilə bağlı politoloq Samir Hümbətov Crossmedia.az-a açıqlama verib:
"Əslində, görüş üçün Pakistanın seçilməsi təsadüfi deyil. Çünki artıq İran demək olar ki, regiondakı bir çox qonşu dövlətlərlə münasibətlərində ciddi gərginlik yaşayıb. Ermənistan üçün də ABŞ ilə görüş keçirə biləcəyi alternativ məkanlar xeyli məhdudlaşıb.
Regionda Türkiyə ilə münasibətlər gərgindir, Azərbaycanla münasibətlər məlumdur, ərəb ölkələri ilə də vəziyyət eyni dərəcədə mürəkkəbdir. Bu baxımdan Pakistan müəyyən mənada uyğun və balanslı platforma kimi önə çıxır".
Ekspert əlavə edib ki, Pakistanın ABŞ ilə münasibətləri pis deyil, ümumilikdə normal səviyyədədir:
"Eyni zamanda Pakistanın İran və Çinlə əlaqələri də kifayət qədər yüksək səviyyədədir. Bu isə onu müxtəlif tərəflər üçün qəbul edilə bilən vasitəçi və ya görüş məkanı kimi əlverişli edir.
Lakin bütün bunlara baxmayaraq, mən bu görüşdən ciddi nəticə çıxacağına çox da inanmıram. Çünki həm ABŞ-ın, həm də İranın irəli sürdüyü şərtlər kifayət qədər sərt və uzlaşması çətin olan şərtlərdir. Bu səbəbdən tərəflərdən hər hansı birinin bu şərtləri qəbul edəcəyi o qədər də inandırıcı görünmür".
Ayhan
15:42 28.03.2026
Oxunuş sayı: 56
