İstəyimiz Heydər Əliyevi hakimiyyətə gətirmək idi - MÜSAHİBƏ
Ümummilli Lider Heydər Əliyev haqqında müsahibə hazırlamaq istəyirdim və müsahib olaraq böyük həvəslə onu düşünürdüm. Bir qədər fikirləşdim, bu mövzuda ondan müsahibə almağı niyə bu qədər istəyirdim? Cavab o qədər də çətin deyildi.
Səbəb onun Ulu Öndərə sonsuz sədaqəti idi. Axı, Heydər Əliyev üçün dövlət işində, dostluqda və digər bütün məsələlərdə sədaqət həmişə ön planda olub.
İnsan insana nə qədər sədaqətli olarmış! Heydər Əliyevi müdafiə etdiyinə görə 4 dəfə işdən uzaqlaşdırılmışdır! Ən qarmaşıq dövrlərdə heç kimdən, heç nədən qorxmadan, çəkinmədən öz jurnalist ədalətini nümayiş etdirmişdi.
O, Xeyrəddin Qoca idi. “91-lər”dən biri olub.
Xeyrəddin Qocadan müsahibə almamışdan əvvəl, təbii ki, onun haqqında çoxlu məlumat əldə etməyə çalışdım. Hər oxuduğum yazı, hər baxdığım material məndə yeni suallar doğururdu. Görürdüm ki, o, adi bir ziyalı, yazıçı deyil, düşüncələri, sözləri ilə çoxlarından fərqlənən şəxsiyyətdir. Beləcə, əvvəlcə Heydər Əliyevlə bağlı suallardan başlamalı olduğum bu müsahibə getdikcə daha dərin və maraqlı bir söhbətə çevrildi..
— Ümummilli liderlə ilk tanışlığınız necə olub?
— 1969-cu ildən — Heydər Əliyev ilk dəfə Azərbaycan hakimiyyətinin başına gələndən onu diqqətlə izləyirdim.
Daim onun nitqinə, şəxsiyyətinə, xarizmasına, davranışına, geyim tərzinə diqqət yetirirdim. Moskvada Kremldən uzaqlaşdırılandan sonra Azərbaycanın və Rusiyanın Kommunist mətbuatı Heydər Əliyevə və onun ailəsinə böhtan və iftiralar atır, bu ailəni ləkələməyə çalışırdı. Əlimə qələm almamışdan əvvəl düşündüm ki, mənim bu böyük şəxsiyyəti müdafiə etmək gücüm varmı? Vəzifəm, pulum, arxamda heç kimim yox idi. Bəs mən də bunu etməsəm, kim edəcəkdir, -deyə fikirləşirdim.
“Dan ulduzu” qəzetinin baş redaktoru işləyirdim. Bir gün qəzetdə “Vəzirov haqqında düşünərkən…” adlı məqalə dərc etdim. Orada Ə.Vəzirovun Heydər Əliyevin vaxtilə işə götürdüyü adamları hamısını öz işlərindən uzaqlaşdırılmasından bəhs edirdim.
Məni çağırıb dedilər ki, sən Heydər Əliyevi müdafiəyə qalxdığın üçün işdən uzaqlaşdırılırsan. Sonralar işlədiyim qəzetlərdən də eyni səbəbdən daha 3 dəfə işimdən azad edildim.
Nəhayət, Heydər Əliyev Moskvadan Bakıya gəldi. Biz onu hava limanında VİP salonunda qarşıladıq. Üz-üzə ilk görüşümüz də orada oldu. Yazılarımdan xəbəri var idi. Qardaşı akademik Cəlal Əliyev məqalələrimi Moskvaya Heydər Əliyevə göndərmişdi. Həmin məqalələrdə o zamankı iqtidarın məmurlarından yazırdım. Birdən Heydər Əliyev “Sən nə etmisən?” - deyə mənə sual verdi. Təəccüblə “Nə etmişəm?”-deyə suala sualla cavab verdim.
“Sən özünü əjdahaların, ilanların içinə atmısan! Hakimiyyət səni, ailəni məhv edə bilərdi!” Nəisə…
Cəlal müəllimgilə yollandıq…
— Xeyrəddin müəllim, Cəlal müəllimin evində nələr olduğunu danışa bilərsiniz?
— Evə çatıb əyləşmək istəyəndə H.Əliyev mənə “Sən masanın başına keç”- dedi.
“Çünki böyük kişilik etmisən, bu faktordur. Sənin yerin oradır”. Çox mütəəssir oldum! Axı, Heydər Əliyev olan yerdə mən necə başa keçə bilərdim?
Bir gündən sonra Heydər Əliyev Naxçıvana- doğma vətəninə getdi. Səhəri gün mənə zəng vurdu: “Oğul, mənə xalqın sevgisindən yazırdın. Gəl, yazdıqlarını özün gör”. Mən Naxçıvana çatanda nələr gördüm? Əhali müqəddəs pirə gəlirmiş kimi Heydər Əliyevi ziyarətə gəlmişdi.“Комсомольская правда” yazırdı ki, guya Heydər Əliyevi 30 min adam qarşılamışdı. Mən isə “Комсомольская правда”ya cavab olaraq yazdım ki, Heydər Əliyevi 80 min adam qarşılayıb!
— Heydər Əliyevin digər rəhbərlərdən fərqi nə idi?
— O çox sadə insan idi. İndi xatırlayıram ki, Naxçıvanda soyuq qış başlamışdı. Heydər Əliyev əsgərlər qarşısında çıxış edirdi. Mən qalın kürk geyinmişdim, amma donurdum. Heydər Əliyev isə kostyumda 1 saat nitq elədi. Əlləri ağappaq olmuşdu. Xırda-xırda qar yağırdı. Mən də, Bəylər müəllim də Heydər Əliyevə çətir gətirmək istədik. Heydər Əliyev dönüb bizdən soruşdu: “Camaatda çətir var?”
Heydər Əliyevin ailəsinin də sadə həyatı vardı. Oğlu İlham Əliyevə Bakıda bağda, qızı Sevil xanıma isə Moskvada bağda 12-15 nəfərin iştirakı ilə toy etmişdi. Heydər Əliyev mənə dedi ki, “Vəzifəli adamlara böyük hədiyyələr verirlər. Başqaları kimi toy edib, hədiyyələr qəbul etməliydim?”
Heydər Əliyev Dövlət Təhlükəsizlik Komitəsinin sədri olanda şöbə müdirləri ona məlumat verirlər ki, “qadınların çox sevdiyi “Klimat” adlı ətir satılır. Sizin həyat yoldaşınıza lazımdırmı?” H.Əliyev telefonda Zərifə xanıma zəng vurmuş, o da “bir ədəd bəsimdir” demişdir. Şöbə müdirləri isə hərəsi 10-15 ədəd almışdılar..
— Heydər Əliyevin ciddi adam olduğunu hamı bilir. Sizə qarşı necə, mehriban idi?
— Bəli, çox mehriban idi. Bəzən zarafatlar da edirdi. Bir dəfə Prezident kabinentində idi, yanına gəldim. Gördüm, otaq çox uzundur. Soruşdum ki, “Heydər Əliyev, səhərdən-axşama qədər bu boyda otaqda darıxmısınız?” Ürəkdən güldü və dilləndi: “Ay Xeyrəddin, bilmirsən ki, bu boyda ölkənin dərdi-səri hamısı mənimlədir?”
“Güldünüz, kefiniz açıldı, bax mənə bu lazım idi”- deyə cavab verdim.
— Bəs, nə zamansa sizə irad bildirib?
— Heç vaxt. Türkiyə Cümhuriyyətinin İstanbul şəhərində baş konsul vəzifəsində işləyirdim. Ölkəyə, ailəmin yanına qayıtmaq istəyirdim. İkinci dəfə özbaşına deputatlığa namizəd oldum. Sözsüz, bu, partiyanın qərarı ilə ola bilərdi. Mən eşitmişdim ki, H.Əliyev necə əsəbləşmişdi. Lakin o mənə bu barədə heç nə demədi…
1999-cu ildə ürək ağrılarıma görə İstanbuldakı Alman xəstəxanasına getdim və mənə 3 damarımın tutulduğunu, əməliyyata ehtiyac olduğunu dedilər. Heydər Əliyev bunu biləndə lazımi vəsaiti ayırdı, Londonda Kromvel Klinikasında əməliyyat olundum. O vaxtdan 27 il keçib.
— Heydər Əliyevin hakimiyyətə gəlməsi, müstəqilliyin əbədiləşdirilməsi prosesinin canlı şahidi olmusunuz. Bu haqda nələr deyə bilərsiniz?
— 90-ci illərin əvvəlləri Azərbaycanda hərc-mərclik idi. Vəzifə üstündə dava gedirdi. Biz 91 nəfər Heydər Əliyevə müraciət etdik və o da müraciətə müsbət cavab verdi və Yeni Azərbaycan Partiyası quruldu. Partiyanın qəzeti olmalı idi. Heydər Əliyev Bakının o zamankı meri Rafael Allahverdiyevlə məni Naxçıvana çağırdı və mənə əvvəlcədən razılaşdığımız “Yeni Azərbaycan” adlı qəzeti 10 günə çıxarmağımı tapşırdı. Mən isə bunun mümkünsüzlüyünü, qəzetin otağının, müxbirlərinin olmadığını, məqalələr yazılmadığını bildirdim. Heydər Əliyev “Bürokrat olma, get, qəzeti çıxar”- dedi.
Deyilən müddətdə qəzet çap olundu, o da buna sevindi. 5 il qəzetin baş redaktoru oldum…
— Şəxsən siz Heydər Əliyevdən nə öyrənmək istəyirdiniz?
— Onun gözəl danışıq, nitq qabiliyyəti var idi. Geyiminə xüsusi fikir verirdi. Oturuşunu, duruşunu, yəni davranışını bilirdi. Heç zaman qaba ifadələrdən istifadə etmirdi…
Prezident İlham Əliyev də Ümummili Lider olan atasından çox şeyləri əxz edib. Güclü siyasətçi kimi yetişib. Prezidentimizin böyük siyasətinin nəticəsidir ki, işğal edilmiş torpaqlarımızı geri qaytardı, tarixdə əbədi yerini tutdu...
Fatimə Şahverdiyeva
11:25 12.12.2025
Oxunuş sayı: 21425
