Hakan Fidan: ABŞ Respublikaçıların idarəsi altında Suriyadan qoşunlarını çıxara bilər
Türkiyənin xarici işlər naziri Hakan Fidan bildirib ki, ABŞ Respublikaçı administrasiyası Amerika qoşunlarının Suriyadan çıxarılması layihəsini həyata keçirə bilər, çünki onların olması faydadan çox problem yaradır.
Сrossmedia.az xarici KİV-ə əsasən xəbər verir ki, “800 Amerika hərbçisinin Suriyada olması ABŞ-a o qədər də sərfəli deyil. Əksinə, bu, xüsusilə İran qüvvələrinə qarşı hərbi əməliyyatları çətinləşdirir, çünki əsgərlər hədəfə çevrilir, faktiki olaraq girov saxlanılır. Bu, yalnız eskalasiyanı artırır”, - deyə Fidan Ankarada jurnalistlərə bildirib.
Nazir vurğulayıb ki, demokratlar bir vaxtlar qoşunları Əfqanıstandan effektiv şəkildə çıxara bilməyiblər və bu, ciddi siyasi nəticələrə gətirib çıxarıb. Bununla belə, Respublika administrasiyasının, onun fikrincə, Suriyada belə bir planı həyata keçirmək üçün daha çox imkanları var.
Fidan xatırladıb ki, Donald Tramp artıq ilk prezidentlik dövründə Suriyadan qoşunları çıxarmaq cəhdləri edib, lakin hərbi rəsmilərin müqaviməti ilə üzləşib. İndi respublikaçıların hakimiyyətə qayıdışı ilə bu istiqamətdə müsbət addımlar gözləmək olar.
Gültac Mehdizadə
14:18 23.11.2024
Oxunuş sayı: 17930
