MEK-də “Bilik Günü” sərgisi açılıb
Azərbaycan Respublikasının Prezidenti İlham Əliyevin 2004-cü il 21 avqust tarixli Fərmanına əsasən sentyabrın 15-i ölkəmizdə Bilik Günü kimi qeyd olunur. Bu əlamətdar gün münasibətilə Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) sərgi təşkil edilib. Sərgidə təhsil və elm mövzusuna həsr olunmuş zəngin ədəbiyyat oxucuların ixtiyarına verilib. Burada təhsil sahəsində tarixi inkişaf mərhələlərini, dövlət siyasətini və müasir çağırışları dolğun şəkildə əks etdirən “Heydər Əliyev və Azərbaycanda təhsil siyasəti”, “Heydər Əliyev məktəblilərin gözü ilə”, "Prezident İlham Əliyev və Azərbaycanda təhsilin inkişafı - 2003-2008", “Təhsil millətin gələcəyidir”, “Azərbaycanın təhsil siyasəti”, “Təhsilin idarəetməsinə yeni yanaşmalar”, “Təhsil və cəmiyyət. Təhsil islahatının dinamikası” adlı nəşrlər, o cümlədən “Azərbaycanda təlim-tərbiyə mədəniyyəti, təhsil və pedaqoji fikir tarixi”, “Təhsilimiz: dünəndən sabaha”, “Müəllimlərin peşəkar inkişafı beynəlxalq təcrübədə”, “Azərbaycan təhsil tarixi oçerkləri və ilk ali təhsillilərimiz”, “Müəllim və müəllimlik” və digər dəyərli nəşrlər nümayiş olunur. Burada, həmçinin 1888-ci ildə A. O. Çernyayevskinin və Səfərəli bəy Vəlibəyovun tərtibində işıq üzü görən və Azərbaycanda ilk əsaslı dərs vəsaiti olan "Vətən dili"nin II hissəsi, Respublikanın ilk Əməkdar müəllimi – Akif Bayram, İrəvan müəllimlər seminariyası və onun məzunları haqqında kitablar da yer alıb. Sərgi iki həftə müddətində davam edəcək və bütün maraqlanan oxucular üçün açıq olacaq.
16:49 15.09.2025
Oxunuş sayı: 967
