“Suriya rəhbərinin Azərbaycana gəlməsi dünyaya mesajdır ki, vətəndaş savaşının həllində Azərbaycanın da rolu var”
“Suriya Ərəb Respublikasının keçid dövrü Prezidenti Əhməd Əl Şaraa Azərbaycana səfər etməsi və Bakıda İsrail dövlət nümayəndələri ilə görüşməsi Azərbaycanın - Bakının siyasi mərkəzə çevrilməsinin göstəricisidir. Təbii ki, bu bizi sevindirir. Bilirsiniz ki, dünya siyasətinin idarə olunmasında bəzi mərkəzlər var. Artıq Azərbaycan da siyasi mərkəzə çevrilib. Bu bizim üçün xoş irəliləyişdir. Azərbaycanın Suriyanın inkişafında, Suriyadakı proseslərin sabitləşməsində rolunun olması bizim üçün çox vacibdir. Bu, Türkiyə üçün də əhəmiyyətlidir. Bilirsiniz ki, Suriyada idarəetmə dəyişəndən sonra ilk humanitar yardım edən dövlətlər sırasında Azərbaycan dövləti də var idi. Bu da Türkiyə üzərindən həyata keçirilmişdi. Yəni biz regionda artıq öz sözümüzü deyə bilən bir dövlətə çevrildik. Bu məsələdə də Türkiyə ilə birgəliyimiz təqdirəlayiqdir”. Bu sözləri “Hilal” Sosial Araşdırmalar Mərkəzinin rəhbəri, politoloq Arzuman Abdulkərimov deyib.
O bildirib ki, Ərdoğan iqtidarı da Suriyanın indiki hökuməti ilə çox ciddi təmaslardadır: “Uzun zaman idi ki, Türkiyə Suriyadakı idarəetməni dəyişməyə çalışırdı. Türkiyə öz sərhədlərində demokratik Suriyanın olmasını istəyirdi. Düşünürəm, bu yöndə addımlar atılır. Deyə bilmərik ki, indi Suriyada hər şey normaldır, yüksək səviyyədədir. İstənilən halda Türkiyə birinci mərhələdə buna nail ola bilib. Düşünürəm, bundan sonra da bu siyasət davam etdiriləcək. Bundan öncə də İsraillə İran, Türkiyə nümayəndələri arasında Bakıda görüşlər keçirilməsi ilə bağlı təsdiq olunmuş, həm də təsdiq olunmamış xəbərlər var idi. Bu da bizi sevindirir. Bakının siyasi mərkəzə çevrilməsi cənab Prezident İlham Əliyevin apardığı uğurlu xarici siyasətin nəticəsidir. Azərbaycanın çox ciddi uğurlu xarici siyasəti var. Cənab Prezident və onun xarici siyasətdən məsul olan komandası yüksək performans göstərir. Biz də bunu təqdir edirik. Suriya rəhbərinin Azərbaycana gəlməsi dünyaya bir mesajdır ki, Suriyada illərdir, davam edən vətəndaş savaşının həllində Azərbaycanın da rolu var. Azərbaycan artıq söz sahibidir və regionda gedən proseslərdə birmənalı öz iştirakını təmin edə bilib”.
15:10 14.07.2025
Oxunuş sayı: 1243
