Azərbaycan jurnalistikasına dəyərli töhfə - “Əbülfəz Babazadə mətbuat aynasında” kitabı işıq üzü görüb
Azərbaycan milli mətbuatının 150 illiyinə həsr olunmuş sanballı bir nəşr – “Əbülfəz Babazadə mətbuat aynasında” adlı kitab nəşr edilib.
Kitabın tərtibçisi və ideya müəllifi Prezident Kitabxanasının Kitabxana-biblioqrafiya xidməti bölməsinin müdiri Sonaxanım Abasova, redaktorları “Bakinskiy raboçiy” qəzetinin baş redaktoru, Əməkdar jurnalist İlqar Hüseynov və AMEA Mərkəzi Elmi Kitabxanasının direktor müavini, filologiya üzrə fəlsəfə doktoru, dosent Şəhla Tahirqızıdır.
Nəşrdə 1999-cu ildən 2025-ci ilin əvvəllərinə qədər Əbülfəz Babazadənin mətbuatda dərc olunan 1400 yaxın məqalə, analitik yazı və müsahibələrinin biblioqrafik göstəricisi yer alır. Kitabda, həmçinin müəllifin həyat və yaradıcılığına dair əsas tarixlər, tanınmış alim və ziyalıların onun haqqında fikirləri, eləcə də onun jurnalist və tədqiqatçı kimi fəaliyyəti haqqında qiymətli rəylər toplanmışdır.
Kitabın ön sözündə vurğulandığı kimi, bu biblioqrafik toplu yalnız bir jurnalistin fəaliyyət salnaməsi deyil, eyni zamanda müasir Azərbaycan mətbuatının inkişaf panoramasını əks etdirən bir sənədli mənbədir. Burada siyasi publisistika, milli mədəniyyət, beynəlxalq münasibətlər, Qərbi Azərbaycan, Qarabağ və müasir informasiya mübarizəsi kimi çoxsaylı aktual mövzularda müəllifin qələmə aldığı yazılar oxuculara təqdim olunur.
Əbülfəz Babazadənin siyasi və ictimai fikrə təsir göstərən yazıları həm mətbuat sahəsində, həm də kulturologiya, tarix, musiqi, xoreoqrafiya və pedaqogika sahələrində aparılan elmi-publisistik fəaliyyətin bariz nümunəsidir. Kitabda təqdim olunan məqalələr onların müəllifinin sözə məsuliyyətlə yanaşan, milli dəyərləri qoruyan və təbliğ edən bir ziyalı olaraq formalaşdığını sübut edir.
“Əbülfəz Babazadə mətbuat aynasında” kitabı jurnalistlər, tədqiqatçılar, kulturoloqlar, tələbələr və Azərbaycan mətbuat tarixi ilə maraqlanan hər kəs üçün əvəzsiz bir mənbədir.
15:21 17.06.2025
Oxunuş sayı: 15275
