MEK-də növbəti könüllülük proqramı uğurla başa çatıb
Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) təşkil olunan növbəti könüllülük proqramı uğurla yekunlaşıb. Proqramda iştirak edən gənclərə sertifikatlar, xasiyyətnamələr, kitabxananın birillik oxucu kartları təqdim olunub.
MEK-in direktoru texnika elmləri doktoru Hüseyn Hüseynov könüllüləri təbrik edərək onlara təhsildə və gələcək karyeralarında uğurlar arzulayıb.
MEK rəhbəri bildirib ki, üç ay ərzində könüllülər kitabxana mühitində praktiki təcrübə qazanmaqla yanaşı, kitabxananın müxtəlif şöbə və fondlarında çalışaraq komanda işi, vaxtın idarə olunması, istifadəçilərlə ünsiyyət kimi bacarıqlarını da inkişaf etdirməyə imkan tapıblar. Direktor bu cür proqramların gənclərin peşəkar inkişafında mühüm rol oynadığını vurğulayaraq, gələcəkdə də könüllülük fəaliyyətlərinin davam etdiriləcəyini qeyd edib.
Hüseyn Hüseynov onu da diqqətə çatdırıb ki, könüllülər kitabxananın bütün sahələrində öz potensiallarını sınamaq imkanı əldə ediblər və nəzəri biliklərini praktiki bacarıqlarla möhkəmləndiriblər. Direktor proqram çərçivəsində fəaliyyət göstərən hər bir gəncə sertifikatla yanaşı təqdim olunan kitabxanın birillik oxucu kartaları vasitəsilə MEK-in zəngin fondlarından istifadə edə biləcəklərini də deyib.
Tədbir zamanı MEK-in elmi katibi, “MEK könüllüləri” proqramına məsul şəxs Şəbnəm Rüstəmova könüllülərin fəaliyyəti barədə təqdimatla çıxış edib. Bildirilib ki, gənclər kitabların inventar nömrələrinə görə sıralanması, topoqrafik kartoçkaların hazırlanması, sənədlərin işlənməsi və elektron kataloqa daxil edilməsi, nəşrlərin rəqəmsallaşdırılması kimi müxtəlif işlərə cəlb olunublar. Onlar, həmçinin oxuculara xidmət göstərərək sənəd sifarişlərini yerinə yetiriblər. Bundan başqa, könüllülər MEK-də ilk dəfə həyata keçirilən “İnklüziv xidmət” layihəsinə qoşularaq fonddakı seçilmiş kitabların səsləndirilməsində də aktiv iştirak ediblər.
Tədbirdə çıxış edənlər gənclərin qısa müddət ərzində əldə etdikləri nailiyyətləri yüksək qiymətləndiriblər. Onlar ölkənin bir sıra qurumlarında olduğu kimi MEK-də də könüllülük hərəkatının aparılmasını təqdirəlayiq hal kimi qiymətləndiriblər.
Könüllülər də öz növbəsində MEK-i nəzəri biliklərin praktiki tətbiqi baxımından bir məktəb kimi dəyərləndirərək yaradılan imkanlara görə təşəkkürlərini bildiriblər.
17:49 11.06.2025
Oxunuş sayı: 6424
