Malayziya nəşrlərində Azərbaycandakı “Konstitusiya və Suverenlik İli” barədə məqalə dərc olunub
Malayziyanın nüfuzlu “Astro Awani” və “New Straits Times” qəzetlərində “Birləşmiş Millətlər əxlaqı” sərlövhəli məqalə dərc olunub. Azərbaycanın Malayziyadakı səfirliyinin müşaviri Elsevər Salmanovun müəllifi olduğu məqalədə Prezident İlham Əliyevin müvafiq Sərəncamına əsasən ölkəmizdə 2025-ci ilin “Konstitusiya və Suverenlik İli” elan olunmasının mahiyyətini oxucuya izah edilir.
Məqalədə bəşəriyyətin yaranmasından bəri normalara duyulan ehtiyacın səbəbləri, tarix boyu mədəniyyət və siyasi fikir sahələrinin inkişafı kontekstində hamı üçün məqbul olan “ümumi xeyir” anlayışının mənimsənilməsinin əhəmiyyəti, normalara riayət olunmamasının vahiməli nəticələri, Millətlər Cəmiyyətinin yaradılmasının səbəbləri, BMT Nizamnaməsinin əhəmiyyəti, beynəlxalq hüquqda “suveren bərabərlik” prinsipinin əhəmiyyəti, dövlətlərin böyüklüyündən asılı olmayaraq bir-birinin ərazi bütövlüyü, siyasi müstəqilliyi və suverenliyinə hörmətlə yanaşılmasının zəruriliyindən söz açılır.
Yazıda Azərbaycanın Ermənistan tərəfindən işğal olunmuş əraziləri ilə bağlı önəmli beynəlxalq hüquq məsələsini 30 ilə yaxın müddət ərzində səbir göstərərək, danışıqlar yolu ilə həllinə çalışmasına baxmayaraq, heç bir nəticə əldə edilmədiyi, nəticədə problemin 2020-ci və 2023-cü illərdə beynəlxalq hüquqa uyğun olaraq hərbi yolla həll edildiyi vurğulanıb.
Diplomat məqaləsində BMT Nizamnaməsinin müddəalarına riayət olunmasını mədəniyyət və əxlaq səviyyəsi ilə eyniləşdirir. Bəşəriyyət üçün əsas çağırışların yoxsulluq və iqlim problemləri olduğunu diqqətə çatdırır və gələcək nəsillərin firavan yaşaması üçün hamını məsuliyyətli olmağa çağırır. (Azərtac)
08:03 30.05.2025
Oxunuş sayı: 1014
