Məlahət Hümmətqızının yeni kitabı Müstəqillik Günündə təqdim edildi
Bakıda keçirilən IV Türk Dünyası Ədəbiyyat və Kitab Festivalında həkim-yazar, Azərbaycan Yazıçılar Birliyinin üzvü, Prezident təqaüdçüsü Məlahət Hümmətqızının "Məktub yetişdi" adlı kitabının təqdimatı baş tutub.
Həkim-yazar Məlahət Hümmətqızı bildirib ki, bu gün Azərbaycanda Dövlət Müstəqilliyi Günü qeyd olunur. Bu əlamətdar tarix onun üçün həm də şəxsi sevinc və qürur günüdür. Çünki bu gün onun “Məktub yetişdi" adlı yeni kitabının təqdimat mərasimi və imza günü ilə üst-üstə düşür.
M.Hümmətqızının sözlərinə görə, bu günün onun həyatında ikiqat bayram kimi qeyd olunması təsadüfi deyil. Yazıçı bildirib ki, xalqımızın azadlığı və dövlətimizin müstəqilliyi hər bir vətəndaş üçün fəxr və qürur mənbəyidir: “Biz dövlətimizin müstəqilliyi ilə, azadlığı ilə qürur duyuruq. Fəxr edirik ki, belə bir ölkədə yaşayırıq”.
Məlahət Hümmətqızı qeyd edib ki, təqdim edilən “Məktub yetişdi” adlı kitab povest və hekayələrdən ibarətdir. Onun sözlərinə görə, əsərlərin bir qismi əvvəlki variantlardan fərqli olaraq yenidən işlənib, təkmilləşdirilib. Yazıçı bu hekayələrdə müxtəlif obrazların talelərini, cəmiyyətdə baş verən hadisələri, insanların üzləşdiyi çətinlikləri və bu çətinliklərə qalib gəlmə səhnələrini əks etdirməyə çalışıb.
Yazıçı onu da vurğulayıb ki, əsərlərdəki məzmun və süjet xətləri oxucular üçün həm düşündürücü, həm də maraqlıdır. Bu baxımdan o, oxuculara yeni kitabı mütləq oxumağı tövsiyə edib: “Həyat hekayələri ilə zəngin, çox maraqlı kitabdır”.
Daha sonra, mərhum millət vəkili Qənirə Paşayeva ilə yaxın münasibəti olan Məlahət Hümmətqızı xatirələrini də bölüşüb. Onların tanışlığı Azərbaycan Tibb Universitetində təhsil aldıqları illərə təsadüf edib. Onun sözlərinə görə, Qənirə Paşayeva ilə eyni ildə Tibb Universitetinə daxil olub və eyni ildə də ali təhsili başa vurublar. Hər ikisi universiteti bitirdikdən sonra öz sahələrində fəaliyyətə başlayıblar. Sonda Məlahət Hümmətqızı Qənirə Paşayevanın vəfatının onu dərindən sarsıtdığını deyib. O bildirib ki, Qənirə xanımı hər zaman gözəl və unudulmaz xatirələrlə xatırlayır, bundan sonar da xatırlamaqda davam edəcək.
Fatimə Nəbiyeva
Zəhra Ağayeva
19:07 28.05.2025
Oxunuş sayı: 19363
