Moskvada Azərbaycanın İkinci Dünya müharibəsində verdiyi töhfədən bəhs edən kitabın təqdimatı keçirilib
Moskva Dövlət Müdafiə Muzeyində “Böyük Qələbənin varisləri” adlı kitabın təqdimat mərasimi keçirilib. Kitabın müəllifi “Diaspor fəaliyyətinə jurnalistlərin dəstəyi” İctimai Birliyinin sədri, azərbaycanlı publisist və tədqiqatçı Fuad Hüseynzadədir. Nəşr İkinci Dünya müharibəsində Qələbənin 80 illiyinə həsr olunub və keçmiş Sovet İttifaqı xalqlarının, xüsusilə Azərbaycanın bu Qələbəyə verdiyi töhfəni işıqlandırır.
Təqdimat zamanı çıxış edən müəllif qeyd edib ki, kitab ilk növbədə beynəlxalq auditoriyaya ünvanlanıb. Kitabda Azərbaycanın Qələbəyə verdiyi töhfə, xalqın ictimai-siyasi, iqtisadi və hərbi sahələrdə iştirakı, eləcə də ata və babaları da İkinci Dünya müharibəsində döyüşmüş xaricdə yaşayan azərbaycanlıların qəhrəmanlıqları təfərrüatlı şəkildə təhlil olunub. 44 günlük Vətən müharibəsində Azərbaycanın ərazi bütövlüyünün bərpasında iştirak etmiş yeni nəslin nümayəndələrinə da xüsusi yer ayrılıb.
“Biz beynəlxalq ictimaiyyətə çatdırmaq istəyirik ki, qəhrəmanlıq Azərbaycan xalqının milli kodunun bir hissəsidir, Azərbaycanın əsl brendi isə onun insan kapitalı və qəhrəmanlarıdır”, – deyə Fuad Hüseynzadə vurğulayıb.
Azərbaycanın Rusiyadakı səfirliyinin müşaviri Yusif Vəzirov müəllifi kitabın işıq üzü görməsi münasibətilə təbrik edib və bu cür əsərlərin tarixi yaddaşın qorunması və Azərbaycanın beynəlxalq imicinin möhkəmləndirilməsi baxımından əhəmiyyətini qeyd edib.
Tədbirdə “Xəzər Biznes Təşəbbüsü” təşkilatının prezidenti Gülnarə Rəhimova-Dəniz bildirib ki, babası müharibə veteranı, nənəsi isə Leninqrad mühasirəsinin şahidi olub. Onun sözlərinə görə, bu kitab qəhrəmanlıq keçmişinin yaddaşda saxlanması və bu dəyərlərin gələcək nəsillərə ötürülməsi işinə mühüm töhfədir.
Tədbirdə iki dəfə Sovet İttifaqı Qəhrəmanı olmuş, tank qoşunlarının qvardiya generalı Həzi Aslanovun adını daşıyan Regional Veteranlar Cəmiyyətinin sədri Əli Kazımov və sədr müavini İrina Silina çıxış edib.
Tədbirdə çıxış edənlər arasında Rusiyanın Əməkdar müəllimi Qennadi Xobotov, diaspor fəalları Məhəmməd Rəfiyev, Dilavər Nuriyeva, Moskva vilayəti azərbaycanlılarının Regional Milli-Mədəni Muxtariyyətinin sədri Elşən İbrahimov, Moskvadakı “Azərbaycan” cəmiyyətinin sədri Oktay Hüseynov da olub.
Təqdimat çərçivəsində şairə Afaq Şıxlı tərəfindən Birinci Dünya müharibəsi veteranlarına həsr olunmuş şeir də səsləndirilib.
Qeyd edək ki, kitabın təqdimatı daha əvvəl Bakıda və Moskva Müharibə Veteranları Komitəsində keçirilib, yaxın günlərdə isə təqdimatlar Maqadanda və Krasnoyarskda da təşkil olunacaq. (Azərtac)
08:07 24.05.2025
Oxunuş sayı: 27289
