AİB Azərbaycan iqtisadiyyatının 2025-ci il üçün artım proqnozunu yaxşılaşdırıb
Asiya İnkişaf Bankı (AİB) Azərbaycan iqtisadiyyatının 2025-ci ildə 3,4 %, 2026-cı ildə isə 3,3 % artacağını proqnozlaşdırır. Bu barədə banka istinadən xəbər verir. Əvvəlki qiymətləndirmələrlə müqayisədə cari il üçün ÜDM artım tempi proqnozu 0,8 faiz bəndi yaxşılaşdırılıb.
Beləliklə, AİB 2025-2026-cı illərdə Azərbaycan iqtisadiyyatının orta illik artımını 3,35 % səviyyəsində qiymətləndirir.
Eyni zamanda, Bank ümumilikdə Qafqaz və Mərkəzi Asiya ölkələrində zəif xarici tələb səbəbindən iqtisadi fəallığın yavaşlamasını gözləyir: 2024-cü ildə regionda artım 5,7 % təşkil edibsə, 2025-ci ildə 5,4 %-ə, 2026-cı ildə isə 5 %-ə düşəcəyi proqnozlaşdırılır.
Azərbaycan İqtisadiyyat Nazirliyinin proqnozuna görə, 2025-ci ildə ÜDM-in artımı 3,5 % səviyyəsində gözlənilir, ölkənin Mərkəzi Bankı isə bunu 3,3 % qiymətləndirir.
Beynəlxalq reytinq agentliklərinin proqnozları fərqlənir. “S&P Global” illik 2 % səviyyəsində artım, “Fitch Ratings” 2025-ci ildə 3 % və 2026-cı ildə 2,4 %, “Moody's” isə hər il 2,5 % artım gözləyir.
Avropa Yenidənqurma və İnkişaf Bankı (AYİB) 2025-ci ildə 3 %, 2026-cı ildə isə 2,5% artım proqnozlaşdırır, Dünya Bankı isə müvafiq olaraq 2,7 % və 2,4 % gözləyir.
2024-cü ildə Azərbaycan iqtisadiyyatı 4,1 % artıb, lakin 2025-ci ilin yanvar-fevral aylarında artım tempi 0,2 %-dək yavaşlayıb. (report)
09:31 09.04.2025
Oxunuş sayı: 11998
