Şəhid Nüsrətli Ceyhunun doğum günü məzarı yanında qeyd edilib
Torpaqlarımızın bütövlüyü uğurunda gedən döyüşlərdə qəhrəmancasına şəhid olan Nüsrətli Ceyhunun doğum günü onun dəfn edildiyi Beyləqan rayonu ərazisindəki Xocavənd qəsəbəsində yerləşən Şəhidlər məzarlığında anılıb. Mərasim iştirakçıları şəhidlərin məzarları önünə qərənfillər düzərək, onların əziz xatirəsinə ehtiramlarını bildiriblər. Azərbaycanın ərazi bütövlüyü uğrunda şəhid olmuş Vətən övladlarının xatirəsinə dualar oxunub, xatirələri bir dəqiqəlik sükutla yad edilib.
Mərasimdə Azərbaycan ordusunun 44 günlük müharibədə şücaətindən, şəhidin keçdiyi qısa və mənalı həyat yolundan söz açılıb. Bildirilib ki, Nüsrətli Ceyhun 2020-ci il sentyabrın 29-da düşmənin minaatan atəşi nəticəsində şəhidlik zirvəsinə ucalıb. Ölümündən sonra Azərbaycan Respublikası Prezidentinin müvafiq Sərəncamları ilə “Cəsur döyüşçü”, “Vətən uğrunda” və “Suqovuşanın azad olunmasına görə” medalları ilə təltif olunub. (Azərtac)
08:46 09.04.2025
Oxunuş sayı: 1582
