İtaliya Azərbaycan iqtisadiyyatına birbaşa investisiyaları 8 dəfəyə yaxın artırıb
Ötən il İtaliyanın Azərbaycan iqtisadiyyatına cəlb olunmuş birbaşa xarici investisiyalarının həcmi 6,803 milyon ABŞ dolları təşkil edib. Bu barədə Azərbaycan Mərkəzi Bankından məlumat əldə edilib. Məlumata əsasən, 2023-cü ildəki göstərici ilə müqayisədə ötən il sözügedən ölkədən Azərbaycan iqtisadiyyatına investisiyalar 5,938 milyon ABŞ dolları və ya 7,9 dəfə artırıb.
Hesabat ilində Azərbaycana birbaşa xarici investisiyaların ümumi həcmində İtaliyadan yatırılan investisiyaların payı 0,1% təşkil edib.
Öz növbəsində, Azərbaycan ötən il İtaliya iqtisadiyyatına 72,379 milyon ABŞ dolları sərmayə qoyub ki, bu da 2023-cü ildəki göstərici ilə müqayisədə 38,934 milyon ABŞ dolları və ya 2,2 dəfə çoxdur.
Birbaşa xarici investisiyaların ümumi həcmində İtaliyaya həyata keçirilən Azərbaycan investisiyalarının xüsusi çəkisi 4,1% təşkil edib.
Xatırladaq ki, 2023-cü ildə İtaliyadan Azərbaycana birbaşa xarici investisiyaların həcmi 865 min ABŞ dolları, Azərbaycandan sözügedən ölkəyə yatırılan investisiyaların həcmi isə 33,445 milyon ABŞ dollarına bərabər olub.
Qeyd edək ki, 2024-cü ildə Azərbaycan iqtisadiyyatına birbaşa xarici investisiyalar 7,046 milyard ABŞ dollarına bərabər olub. Bu isə 2023-cü ildəki göstərici ilə müqayisədə 388,1 milyon ABŞ dolları və ya 5,83% artım deməkdir.
Eyni zamanda, hesabat ili ərzində Azərbaycandan xarici iqtisadiyyata yönəldilmiş birbaşa xarici investisiyaların həcmi isə 1,762 milyard ABŞ dolları olub ki, bu da 2023-cü ildəki göstərici ilə müqayisədə 1,354 milyard ABŞ dolları və ya 43,3% azdır. (trend)
09:21 25.03.2025
Oxunuş sayı: 10495
