Ərdoğan: Türkiyə terrora və Qəzzadakı haqsızlığa göz yummayacaq
Türkiyə Prezidenti Rəcəb Tayyib Ərdoğan ölkəsinin Suriya və Yaxın Şərq siyasəti ilə bağlı vacib açıqlamalar verib. O, terror təşkilatlarına qarşı mübarizənin davam edəcəyini və Türkiyənin təhlükəsizliyini təhdid edən qüvvələrə güzəşt edilməyəcəyini vurğulayıb.
Crossmedia.az xəbər verir ki, bu barədə xarici mediada məlumat yayılıb.
"Suriyanın şimalında ölkəmiz üçün təhlükə yaradan terror təşkilatlarına sığınacaq və ya sağ qalmaq şansı verməmişik və bundan sonra da verməyəcəyik. Bizim bu məsələdə tolerantlığımız yoxdur. Problemi həll etmək üçün addımlar atmağa başlayanda heç kim bizi dayandıra bilməz və ya vaxt qazanmağa çalışa bilməz", – deyə Ərdoğan bildirib.
O, həmçinin İsrailin fələstinlilərə qarşı atdığı addımları sərt tənqid edərək, deportasiya planlarını qəbuledilməz adlandırıb.
"Bu deportasiyanı qəbul etmək mümkün deyil. Bu tam bir vəhşilik olardı. Sionistlərin yalanlarına inanmaq və bölgənin tənzimlənmələri ilə oynamaq mövcud yaraların qanamasından başqa bir məqsədə xidmət etməyəcək. Bu, yanlış yoldur. Qəzza içimizdə bir yaradır. Biz bu ağrıları azaltmaq və bu yaranı bağlamaq üçün çox çalışırıq. Təəssüf ki, İslam dünyası hələ də bu məsələdə kollektiv hərəkətə keçə bilmir", – deyə Türkiyə lideri vurğulayıb.
Ərdoğan, İndoneziya, Malayziya və Pakistan prezidentlərinin Osmanlı İmperiyasına istinad etməsinə toxunaraq, bəzi ölkələrin Türkiyəni Osmanlının varisi kimi gördüyünü bildirib.
"Onlar bizə "Siz Osmanlının davamısınız, sizi belə görürük" deyirlər. Onlar bizi çox yaxşı başa düşürlər, amma təəssüf ki, biz özümüz bunu anlaya bilmirik. Problem buradadır", – deyə Ərdoğan əlavə edib.
Fatimə Məmmədova
19:09 14.02.2025
Oxunuş sayı: 8438
