Papa Fransisk: Atəşkəsə hörmət edin, iki dövlətli həllə nail olun
Roma Katolik Kilsəsinin rəhbəri Papa Fransisk İsrail və HƏMAS arasında əldə olunan atəşkəsə görə vasitəçilərə təşəkkür edib. Pontifik, ənənəvi “Angelus” duası zamanı bu sülh prosesində iştirak edən hər kəsi yüksək qiymətləndirib və vasitəçilik edənlərə minnətdarlığını bildirib.
“Bu, çox gözəl bir işdir, vasitəçilərə təşəkkürlər. Bütün vasitəçilərə minnətdarlığımı bildirirəm. Mən də bu mühüm nəticəyə görə iştirak edən tərəflərə təşəkkür edirəm. Ümid edirəm ki, razılaşdırılan məsələlər dərhal tərəflər tərəfindən hörmətlə qarşılanacaq və girovlar nəhayət evlərinə qayıdıb yaxınlarını qucaqlaya biləcəklər. Onlara və ailələrinə dua edirəm. İnanıram ki, hər iki siyasi hakimiyyət beynəlxalq ictimaiyyətin köməyi ilə iki dövlət üçün düzgün həll yoluna gələ bilər. Qoy hər kəs dialoqa, barışığa və sülhə “bəli” desin. Biz hamımız bunun üçün dua edirik: dialoq, barışıq, sülh,” – deyə Roma Papası qeyd edib.
Pontifik həmçinin atəşkəsdən sonra Qəzza zolağına humanitar yardımların çatdırılmasının vacibliyinə toxunub və ümidvar olduğunu bildirib ki, girovlar tezliklə ailələrinə qovuşacaq.
04:23 20.01.2025
Oxunuş sayı: 10543
